投資的天空：短線炒市唔炒股 - 張士佳
歐洲四國領袖在羅馬會晤後，擬推1300億歐元刺激經濟方案，並未帶來太大正面作用，外圍反而因西班牙及塞浦路斯正式申請援助，以及預期歐盟峯會無料到，而出現較大幅度的回調，市場信心仍然偏弱。不過港股依然我行我素，當大家以為無運行之時，卻低開高收。如先前所言，期權莊家上周初的開價，已預示港股在結算前都係無方向居多，市況沉靜，連成交亦再一步縮減，投資者似乎係等結算後才再作部署。
大市似乎唔係太差，不過近日個股表現則差過大市，昨日指數低開之後雖然慢慢回升，但有一段頗長時間，下跌股票數目遠多於上升，直至臨收市前差距才收窄。而過去兩日升幅較明顯的，多屬於帶有公用性質的板塊，可見投資者相當保守。另外，市場現時似係怕內地經濟問題多於歐債危機，因為過去兩日H指的表現皆跑輸恒指。即使有預測指6月新增貸款或接近一萬億元人民幣，對中資股的提振力度都非常輕微，內銀股亦只是個別上升，一反以往出現樂觀的新增貸款預期時，整個板塊齊升的現象。反觀業務受歐洲環境影響較大的大笨象，近日卻頗為強勢，唔多唔少反映了投資者的心態，短線而言，若然要博反彈，恒指應較為可取。
與曾卓鋒(寶來證券業務經理)聯合執筆(逢周三、五刊出)
作者：張士佳、曾卓鋒(寶來證券(香港)業務經理)
上一則: 青心直說：十八大前可炒樓 - 胡孟青
下一則: 外幣兌港元
投資的天空 - 張士佳 舊文
