金融High Tea——羊毛出在羊身上
2012年6月27日
隔夜美股向下，港股朝早亦下挫。內地A股止跌回穩，帶動港股轉跌為升，恒指午後在兩大重磅股匯控(005)及中移動(941)臨尾發力帶動下，以接近全日最高位收市。摩根大通董事總經理兼中國區全球市場業務主席李晶表示，港股目前估值偏低，但受制於周邊及內地經濟，除非全球經濟復甦，否則港股及A股難以反彈。在港股及A股中，李晶睇好服務行業股，包括醫療、教育及零售，唔睇好與建築有關行業。
胡總訪港，中央送大禮。市場估「禮物包」會包括港股直通車，意指港股ETF有可能於內地推出。李晶認為對港股影響不大，但對內地投資者來說，係好事，因為可以直接投資港股。恒指昨日收18982點，升84點。全日成交402億元，仍然異常淡靜，個別公司就跟住業績上落。
咁多間公司公佈業績，我比較留心睇大家樂(341)條數，因為唔止可以從股民角度睇，仲可以從消費者角度去睇。過去一年又話食材加價、人工加、舖租加，樣樣都加，大家唔係幾睇好大家樂的業績，怕佢加價都頂唔順，但結果又唔係咁差喎，大家樂至今年3月底全年少賺8%至4.7億元，每股盈利0.8378元，派末期股息每股0.45元，咁環境盈利跌8％唔算多咯。
最低工資勢必再加
大家樂昨日收20元，新盈利公佈後，佢的市盈率由對上一年的21.8倍，升到23.8倍，雖然純利跌幅唔大，但呢個市盈率仍然係貴，特別係來年成本還會升，純利能否保持都係一個問題，係唔係值咁高市盈率呢？
睇番大家樂詳細數字，去年全年總收入近59.6億，多咗6.2億，升咗11.7％，但純利反而少咗4050萬元，生意做多咗但賺少咗，理由自然係成本上升，拆開幾部份睇，去年大家樂的食材成本用咗19.9億，升2.7億，升幅15.8％；去年人工支出15.1億，升2億，升幅15％；去年租金開支6.7億，升6900萬，升11.5％。唔好話租貴影響物價，睇大家樂最貴的還是原材料和人工，單係呢兩味已升4.7億，唔大加特加食物價錢，點頂？結果各位去食嘢時都會發覺，價錢經常加，30幾元個餐唔貴，40幾元一個餐唔奇，唔想花咁貴食快餐，只能自己帶飯食。
政府加最低工資，美國印銀紙谷高通脹，仲係要市民找數，快餐店唔會唔賺錢白做，最後羊毛出在羊身上。換一個角度，從股東角度去睇，亦真係希望佢咁做，唔通畀盈利跌四、五成呀？而家租金有少少回吐勢頭，但政府又講緊要唔要加28元一個鐘的最低工資，工會話要加到33元、35元，恐怕最後至少要加到31元才能過關，若然如此，快餐業基層員工又要加一成工資以上，快餐店唔加價點頂，大家要預備食飯會更貴啦。
濠賭股無運行
昨日市場傳廣東省要收緊自由行，搞到濠賭股跌到七個一皮，金沙(1928)插5.8％；銀河(027)跌5.7％；永利(1128)跌2.8％。賭股都幾弱，好似隻金沙，4月中見33.02元的高位後一路跌，昨日跌到22.7元，兩個月無咗三分一。呢啲廣東收緊自由行的消息唔知真定假，但係我地個候任梁特首早前話怕自由行太多會推高租金，主動叫中央唔好再擴大，我就覺得有少少倒米。香港候任特首咁講得出口，傳廣東收自由行都多啲人信喎。
陸羽仁
上一頁 下一頁
金融High Tea 舊文
