金融High Tea——風險胃口靜靜升
2012年6月20日
■昨日杜瓊斯通訊社引述知情人士話，中國證監會可能在本月29日前後批准推出與港股掛鈎的上市交易基金(ETF)，港股ETF將在上海交易所和深圳交易所分別上市。
希臘國會大選塵埃落定，希臘免去即時「脫歐」危險，但西班牙10年期國債息升穿七厘高危線，投資者氣都未喘完，又要拎起塊大石，而且仲係重的，歐美升市都好短癮，但係投資者唔買亦唔敢去沽，怕央行出手被佢夾死。
G20(二十國集團)開會，雖然市場普遍認為都係無乜料到，但最怕搞出個意外驚喜就無謂啦！另外，美國聯儲局昨晚開始一連兩日議息，投資者普遍認為面對日益惡化的歐債危機，加上美國和中國經濟都放慢，聯儲局好難乜都唔做，怕佢唔搞QE3(第三輪量化寬鬆)，都會延長「扭曲操作」(沽短債買長債)。市場唔想睇好，亦唔敢造淡，正在觀望中。
抽上插落食快餐
港股昨日只有424億元成交，恒指只跌11點，表面睇無嘢，但期指市場相當玩嘢，在下午3點40分開始進入成交尾段時，期指突然抽高成百點，10分鐘內由19400點急抽到近19500點，當你都未知道佢升乜之際，就馬上掉頭回落，20幾分鐘內急插160幾點，跌突，期指最低見19335點，然後在近低位收市。呢啲狂升急插，玩死散戶，好多人見突破追入，追完升咗幾十點，點知未定神就倒插，唔落定止蝕盤想打靶都打唔切，所以市靜都暗藏殺機，大戶走一個上落就執你百幾點，食吓快餐，個別莊家就炒吓股仔，所以呢兩日都爆出幾隻神仙股點綴一下。
不過唔睇那些狂上狂落的花招，恒指此前兩日累積升近620點，昨日只係回調11點，表現算係不俗，好友未走也。中環茶友話，睇匯市睇到啲走勢，雖然歐羅在希臘選舉後抽高回落，但部份風險貨幣如澳元再上近期高位，昨日造1.016，黃金亦企在1630美元，風險胃納有少少回升，可能都係對聯儲局有憧憬所致。如果呢啲資金方向係啱，對股市都唔可以睇得太淡。
港股ETF未炒過
昨日杜瓊斯通訊社引述知情人士話，中國證監會可能在本月29日前後批准推出與港股掛鈎的上市交易基金(ETF)，港股ETF將在上海交易所和深圳交易所分別上市，最早可能在7月中旬啟動集資。該知情人士又話，中國證監會同時亦會批准在港推出A股ETF，在港交所上市。
這個港股ETF，即係所謂變相直通車，內地人不能來香港買股，但透過買這些港股ETF，就買入一籃子港股。同樣道理作為對等安排，港人唔可以直接買A股，但透過在香港買A股ETF，就等如買到A股，到時好似A50(2823)呢種買影子A股(其實投資在A股窩輪)的基金，恐怕受歡迎程度會受影響。
我同中環茶友傾起，想當年2007年講吓港股直通車，港股都炒到飛起，推住恒指上32000點的高位，如今終於搞得成變相港股直通車，就算規模細啲，都係一個開始，何解傳咗咁耐，都未見有人炒呢個概念？
茶友答法好妙，話炒唔炒主要睇外資大戶，唔係睇散戶，外資大戶怕內地經濟硬着陸，而家無乜興趣玩港股，又或者佢哋未收夠貨，唔想開車，總而言之無乜人提話要因此而買港股。至於散戶，好多早在2萬幾點都買齊貨，扮晒蟹，想收貨都無錢，大戶唔炒，唔通叫散戶炒咩？大戶不動散戶自然不動。
我就話阿爺收水的影響好大，而家話外貿盈餘減少，熱錢又流出多過流入，人民幣銀根唔鬆，阿爺必定要再放存款準備金同再減息，搞得幾搞等到外資都轉行睇好時，先至有得炒。
陸羽仁
上一頁 下一頁
金融High Tea 舊文
