講Talk少咗要搵新水源中環在線：股評人撈埋公關 - 李華華
股市靜過鬼，散戶無心戀戰，搞到C組證券行嘅市場佔有率越來越縮，連續四個月得9%，經紀固然拍烏蠅，一班主攻散戶嘅股評人亦受影響，講Talk外快減少，聽講部份股評人因為咁而越來越積極幫上市公司搞聯誼，實行做埋公關嗰瓣。
前幾年股市旺，好多輪商贊助搞講座，請有知名度嘅股評人講股，吸引一班散戶去聽，聽完就幫襯。知名度有番咁上下嘅股評人通常每場收5000至1萬蚊，極有知名度嘅甚至叫價2、3萬，都幾和味。
但過去大半年個市靜過鬼，每日得300億、400億成交，基本上無得炒，有兩、三間輪商直情鳴金收兵唔出新輪，其他輪商生意少咗亦要「咳筆直」。搞個講座，場租都要錢，計唔掂條數梗係唔搞。有股評人承認，今年起碼做少兩成講座，有啲講座轉咗由保險公司或地產商贊助，轉叫人買保險同買樓。
向上市公司老闆埋手
好彩講Talk收入少咗可以喺第二度搵番，聽聞部份股評人積極向上市公司老闆埋手，話可以幫手約投資者或其他股評人食飯，等多啲人認識間公司，收費萬萬聲。上市公司老闆實想多啲人買佢隻股，還掂都要搵公關搞呢類飯局，搵個出名嘅股評人去搞，應該搵到啲更啱心水嘅潛在股東，點計都抵!
李華華
mailto:LiWaWa@AppleDaily.com
上一則: 國策透視：大建保障房得物無所用 - 郭小民
下一則: 中環在線：新地落力sell鱔稿 - 李華華
中環在線 - 李華華 舊文
