金融High Tea——控險為上
2012年7月23日
股市還在玩跌跌彈彈的遊戲，港股上周五升81點，但去到歐美又插，法國、德國股市跌2％，美股杜指跌0.9％，跌120點，還是那些歐債危機的老話題。我不是說股市不應該為歐債而跌，問題是歐洲債危機長期存在，早幾日為乜要升呢？
其實我都知為乜，股市有大量機構大戶在炒作，市旺的時候，股市不斷膨脹，大戶搵完錢，散戶都可以執吓。但而家股市唔旺，成交薄弱，接近股神巴菲特話大浪過後大家企喺沙灘睇吓自己係唔係仲着緊泳褲(或泳衣)的時候，機構大戶都好難搵食，何況散戶，大戶造出一些人為波浪，只不過為沖脫你嗰半條泳褲。
執笠風險必要迴避
周末聽收音機財經節目，充斥着一些輸咗好多然後打電話問功課的聲音，主持人不無挖苦地回應，而問功課者無助的聲線，的確令人神傷，當中一個問中海發展(1138)，話佢10元買，而家得番3.47元，問主持人點算，有人叫佢繼續持有，有人叫佢逢反彈沽吓，低4、5毫子買番，藉此拉低成本云云。
而家股市唔好，根本逐行逐行搵嘢插，有長線基金為自保不問價沽貨，有對沖基金專吼弱公司狙擊，總之上市公司的小問題可以化大，大問題就更加唔在講啦，散戶揸住唔同種類的股票，有不同危險性。聽散戶問功課時的說話，他們對不同種類的危險認知程度甚低，可以話根本分唔清頭尾，暴露在各種類型風險之中。
我想分析一下上市公司的在各種類型危險，讓散戶自行對照，心中有譜。在各種風險中，最大的莫過於執笠，公司一執，散戶手上的股票變成廢紙，乜都無，當公司出現這種風險時，股價跌得最癲，因為持貨者完全不問價沽貨。
現時湧現一批研究公司出報告狙擊民企，相信都和對沖基金合作搵食，唔止自己沽咗貨，亦搵埋大批人幫手，務求一出擊就將公司打到執笠為止，若目標公司唔多唔少都有啲假數，一被人篤穿，監管機構一查，就好易死。即使無假數，若公司過度借貸，被人唱吓，銀行一驚要收水，公司無人支持，一樣會死。早前民企狙擊風波中，澳優乳業(1717)、歲寶百貨(312)及創益太陽能(2468)等公司停咗牌一直未復番牌，部份可能無事，部份可能係「長停公主」，揸住佢地的股票，真係有得震無得瞓。
從保險的角度，若手持股票有執笠風險，最好迴避，高危類別是借貸率高的民企，特別是既無強硬後台、又不是身處政府要保護的行業，風險系數最高，例如中小型內房股，就是高危典型。你有無聽過「國進民退」的說法，中央在某些行業刻意培植國企搶佔市場，在房地產市場都有此傾向，更添無字頭無背景的小內房股風險。
長線周期等到瞓着
不過有執笠風險，也有發財機會，以2008年那一浪為例，有啲股份真係跌到好驚人，例如玖龍紙業(2689)，在2008年金融海嘯高峰中，銀行怕風險要收債，玖紙負債率高，令人擔心，佢在當年10月跌到最低見0.71元，真係跌到得番個零頭，如果唔係好多人怕佢執笠，唔會跌到咁低。結果玖紙在一年多之後，彈番上高位14.58元，從低位升上高位升咗接近20倍！不過2009年和2010年整個股市都反彈過度，玖紙在隨後一年多內三次見頂，都只係升14個幾的高位，但無力突破，跟住慢慢落，到而家得番3.77元(上周五跌5.5％)。大上大落，莫過如此，至於買貨者是賺是蝕，就睇你識唔識離場啦。
第二種風險是長經濟周期的風險。經濟周期有長中短，最長的行業是無論供應和需求都是長線的，例如航運業，供應的周期長因為造隻船要幾年，船公司訂船通常是在好日子生意做唔切時訂，到船交貨時航運業可能已轉到低潮，就出現生意差但供應多的慘局。
航運業的生意和經濟長周期相關，環球貿易量升，航運業受惠，環球貿易量下降，航運業受損，而貨量主要是流向歐美等發達國家的市場，你諗諗歐洲消費市場還有多長時間才會復甦？一想已令人心驚。美國好過歐洲，但也不是很活躍的狀態，美國人靠借貸消費，樓市好時可以加按去消費，如今失業率高、樓市呆滯，消費也受影響。還未說中國有意縮少低增值產品出口的比例，不斷提高最低工資，內地廠家面對人工高、地租貴、物料成本貴的三難局面，做中國出口生意更添難度。所以李超人借發行信託的方式讓和黃(013)大幅減持珠三角碼頭業務，是看淡內地出口業前景的行動。
上述打電話問功課的股民問到中海發展，它是內地三大航運公司之一，由於佢哋於內地航運業位處重要置，可以假設生意真係好差時，阿爺都會救佢，執笠風險低。
包括中海發展在內的航運股，面對的問題是環球經濟可能長期疲不能興，若果你話玖龍紙業在2009年「唔應該」彈得咁高，航運業更加唔應該彈，以中海發展計，佢在2008年10月底見低位4.32元，之後大力反彈，2010年1月見高位15.4元，我當時已講過，航運業未來面臨供應大增，但生意前景不前朗的問題，反彈過度。後來中海發展開始回，之後一年到2011年1月，即使回吐還是在10元左近上落(恐怕上述問功課的散戶便是在這些時候買貨)，接着在去年開始確認環球經濟反彈只是假象，航運股首當其衝，反覆下跌，中海發展出現一條完美向下的下降軌，上周五收3.47元。
轉盈為虧步入嚴冬
航運股進入轉盈為虧的周期中，中海發展去年還賺10.5億人民幣，雖然倒退近40%還有得賺，佢最近發盈警，話「受國內外航運市場需求不足及運力供過於求拖累運費續跌，以及國際油價續升令燃油成本居高不下影響，預計上半年業績盈轉虧」。我的擔心是航運業的虧損情況，唔係好快可以扭轉，唔係蝕一兩季，而是以年計。
我過去長期留意航運業，在80年代出現航運業低潮，船王包玉剛上岸發展避開航運，東方海外(316)差不多要破產，結果債務重組，重組完有好長時間，按記憶真係有十年八年，東方海外股價都係得1、2元，真係到90年代末先至好番(現價42.3元)。而家有人一見到運費升就睇好航運股，按船公司老闆講，因為油價貴時，出一次船蝕一次，所以被逼加運費，無生意情願唔出船，咁就可以減少虧損，船公司老闆認為航運生意有排都未掂。買長周期股份，同買消費品等短周期股份完全不同，除非你短炒，否則長線投資，唔見周期逆轉，唔好買佢哋，呢啲股近期只是有反彈，無大升，揸住佢等翻身，可能會等到瞓着。
(篇幅所限，下周一續談中短周期股份的問題)
陸羽仁
上一頁 下一頁
金融High Tea 舊文
