中環在線：滙控飯聚葛霖通水? - 李華華
獅子錢莊協助洗黑錢單嘢有排都未散場，英國傳媒窮追猛打，似乎要有滙控(005)重量級嘅前任或現任高層落台先心息。
新近又有傳媒爆料，指滙控前主席葛霖喺滙控承認協助洗黑錢幾個星期前，曾經同一班滙控高層食飯，暗批葛霖有通水之嫌。
監管失敗表遺憾
英國影子內閣財政大臣Chris Leslie借啲意加多腳，叫葛霖一定要企出嚟，喺國會交代清楚，指葛霖作為英國貿易及投資大臣，應該要自爆同滙控高層食飯講過乜。執政黨人就力撐葛霖，話冇證據顯示葛霖有個人失誤，仲話邊有做官嘅要為自己嘅舊東家孭鑊咁話！
葛霖可能想快啲撲火，即刻寫信畀Chris Leslie，指滙控已經話對監管協助洗黑錢失敗感到遺憾，"I share that regret(自己一樣遺憾)"，道曬歉咁款。
不過，葛霖同舊同事食餐飯都俾人大做文章，傳媒仲攞埋葛霖今年1月為前大班浦偉士賀壽，參加佢嘅生日會嚟講，含沙射影一番，在野黨同英國傳媒會唔會因為葛霖一句「遺憾」就放過佢呢，華華深表懷疑！
李華華
mailto:LiWaWa@AppleDaily.com
上一則: 內訌升級雷士傳爆挖角潮
下一則: 中環在線：誠哥輸畀韋哥 - 李華華
中環在線 - 李華華 舊文
