金手指：致各好友大喜訊！我買了熊仔 - 孫柏文
大家如果有貨在手，仲要係啲Beta高(即敏感度極高)嘅股票，睇到「金手指」今日呢條題，係咪好興奮呢？一定想知點解孫柏文呢個出曬名嘅大淡友，會咁樣恭喜啲好友呢？
理由好簡單，雖然我有多重身份，除淡友、白銀戰隊隊長、偶像派財經演員外，最令人認同嘅身份，必定係香港第一明燈。燈力之強，可稱之為燈神，照耀全港。咁點解「致各好友天大喜訊」？因為噚日臨收市，我經過多時冇做過買賣後，買咗恒指熊證。我買得熊證，個市仲唔爆升？
香港第一明燈人人認同
不過就算個市係因我個明燈效應升，我都想解釋點解我會身體力行睇淡。不過喺講睇淡因素之前，我都想樂觀啲咁講單好消息。就係喺印尼開發金礦嘅國際資源(1051)，噚日宣佈金礦成功出產第一條金。佢哋話希望喺未來幾個月，大幅提高產量，至最終每年出產25萬盎斯黃金。咁唔計埋白銀，淨係黃金嘅收入，當金價係1500美元一盎斯，佢哋收入會有接近30億港元。唔知到時出產價要幾多成本一盎斯，同埋唔知係咪真係可以出產量達預期，以佢哋噚日市值78億港元計，呢幾日應該可以一升。想博要短、快、狠。
入正題。早幾年，全球資產嘅價格走勢，因中央銀行們全力介入，已近乎同步升跌。大家買嘅只係央行做唔做嘢，幾時做嘢，同埋做嘢時力度幾大。不過到咗舊年下半年開始，因某啲資產基本因素問題，好似出現「自己走散」迹象。例如，好用力減開支令稅收跌得仲快嘅歐豬國家債券，又或者係咁俾人捉到盤盤數都係假嘅民企們。
假數好，政策後果唔兌現都好，核心嘅問題就係之前借錢畀呢啲機構嘅人，計錯咗風險，即係收嘅息遠比應收嘅水平低，之前花旗國次按都係同一原理，所以先變金融海嘯。
家，市場忽然發覺原來連全市場最蠢嗰個，都知收少咗息時，就會見到債息瘋狂飆升。咁喺任何市場，最蠢嗰個買家，就係政府，家連歐盟裏有錢嘅政府，都話唔會再買西班牙、希臘等國債，又或者冇能力買，結果就係西班牙2、5、10、30年國債，全部債息都升超過七厘。
歐洲放水前股市要喪跌
盤棋已經到局尾，噚日歐洲勁傳一個方案。就係之前歐元區政府諗出來嘅救市基金，唔使政府出錢。只要畀個銀行牌照佢，佢就可以問歐央行借錢，跟住用筆錢買歐豬國債。即係點解？咪又係印銀紙囉。不過印鈔呢個舉動，有好多人反對，要呢批反對派屈服，先要嚇死佢哋。所以，嚟緊嘅幾個禮拜，市場要大跌特跌。跌幅要比舊年秋天時勁。分分鐘要學08年時嗰隻跌幅，全球反印鈔勢力先會被瓦解。
咁08年跌得有幾深？同有幾快？08年嘅今日(圖)，恒指仲喺22000點以上，三個月後，就跌穿11000點。如果今年冇咁嘅速度同跌幅，佢哋係唔會出足夠力度。今年初，歐央行已經試過出啲唔係好夠力嘅招數，到幾個月後嘅今日，西班牙已達爆點。升市唯一動力，就只因我買咗熊證嘅明燈效應。
孫柏文
獨立股評人
本欄逢周二、四刊出
上一則: 好不主席：關我能力乜事？(一) - 盧先亞
下一則: 曾淵滄專欄：內需盈警隨時擴散 - 曾淵滄
~TITLE_S~金手指 - 孫柏文 2012年7月26日 舊文
