中環在線：淩晨少少燒賭王感親入院 - 李華華
《何家養和蜜語》2010年3月，二房女陪賭王出院。
賭王何鴻燊09年7月跌親入院住咗七個幾月，之後耐唔耐都出入醫院，有時話例行檢查，有時真係唔多舒服，聽講賭王噚日淩晨五點幾又入咗養和，好似話係少少發燒感冒，已經即日出院，回家休養。
華華每次聽見賭王入院都大為緊張，擔心唔知事大事小，最好梗係冇乜事幹，只係循例身體檢查，如果有乜大件事，隨時又有爭產好戲上演。賭王身家豐厚，又有四房人，雖則話舊年初已經叫做講好數，但係都唔知道會唔會隨時生變。
《何家養和蜜語》2010年12月，三房長女超雲索爆探病，賭王笑嘻嘻。
《何家養和蜜語》2011年11月，四太梁安琪化身小鳥依人，賭王老當益壯，完全頂得住。
即日出院冇乜事
聽聞賭王噚日淩晨有少少發燒，三太陳婉珍陪佢入醫院檢查，冇乜事就即日出院回家；不過，亦有人話賭王只係入院做例行身體檢查，唔係大病，叫華華唔使咁緊張咁話。查實賭王已經係90歲嘅老人家，近日天氣悶熱，前幾日又打風，有少少唔舒服唔出奇。
賭王舊年10月同11月都曾經入過醫院，11月仲要留院個幾禮拜，90大壽都要喺養和度過，二、三、四房輪住喺醫院為賭王賀壽。仲有四個月就係賭王91歲大壽，希望佢養好身體，今年生日可以大吃大喝啦。
李華華
mailto:LiWaWa@AppleDaily.com
上一則: 港商北上宜先攻華東
下一則: 中環在線：柯清輝戴黑超曬金 - 李華華
中環在線 - 李華華 舊文
