中環在線：君臨天下CY友發達喇！ - 李華華
正所謂「五窮六絕七翻身」，7月首個交易日港股大升，加上CY上場因素，CY相關股份，即係挺梁大孖沙嘅上市公司，好似陳啟宗嘅恒隆地產(101)、鄭家純嘅新世界發展(017)同羅康瑞嘅瑞安房地產(272)，都全部做好，升幅介乎3%至5%，認真畀面！
幾位挺梁大孖沙，最敢言嘅陳啟宗近日比較低調，冇走出嚟為CY僭建風波美言幾句，可能佢都覺得暫時實在冇乜好解釋，諗吓恒隆點樣繼續散貨好過。
8年勁升四倍
講開散貨，恒隆早排都只係攞大角嘴浪澄灣部份貨尾出嚟賣，九龍站上蓋君臨天下繼續惜玉如金。咁就梗係啦，華華聽聞陳啟宗本人有個君臨天下超高層複式單位自住，日日望住無敵大海景，一定知道呢個盤嘅升值潛力啦。
恒隆喺沙士後，04年開賣君臨天下，當時平均呎價八、九千蚊咋，陳啟宗應該知道機會難逢，攞3700萬買咗個1座向海77至78樓複式單位，單位面積2922平方呎，呎價只係1.3萬。
大家仲記唔記得，早兩個月，君臨天下2座77至78樓C室創紀錄，以呎價5.5萬、總價1.24億易手，識加減數嘅，都計到陳生個單位家幾咁值錢啦。地產代理估計，陳生個單位家至少要6萬蚊呎，即係值1.75億，升值3.7倍！不過陳生住緊喺度，個景咁正，居高臨下，望住個窗真係君臨天下咁，佢又點會肯賣吖！
李華華
mailto:LiWaWa@AppleDaily.com
上一則: 泰山石化創辦人跳船
下一則: 中環在線：耀才iBond慶功曬頭?! - 李華華
中環在線 - 李華華 舊文
