金融High Tea——無得傾 等打救
2012年7月3日
胡總來港送大禮，但七一遊行人數仍創近年高位，政治低氣壓，無眼睇，但係股市好似有番少少起色，上周五大力一抽，令全世界醒番一醒。
上周五是期指結算之後，港股初段比較平淡，但到朝早十點九後忽然發癲，短短十五分鐘，一枝箭咁急抽三百點以上，挾死大量淡友，若不是預設止蝕盤，見市升想睇定啲才平倉都無機會，要輸足三百點才有機會走人。
歐貼膠布短期止血
先睇睇歐盟峰會在比利時佈魯塞爾達成甚麼共識。歐盟宣佈同意設立歐羅區銀行的單一監管機構，允許歐洲救市基金：金融穩定機制(ESM)向銀行直接注資協助銀行重組，過去德國一直反對直接向銀行注資，認為要先借俾國家，由國家承擔該國銀行業的債務，今次終於有突破；另外亦同意歐盟向西班牙銀行提供的貸款，不享有優先償債地位，早前歐盟同意向西班牙泵水但要享有優先償債權，馬上令其他西班牙國債債價再急跌，因為那些債淪為次等債，更無人敢買，幫人變害人，今次決定扭轉過來。
歐盟亦同意靈活使用救市基金穩定市場，意味出事時可以直接介入去買歐豬國債，不用歐盟再開會再搞授權。這些措施都馬上可以拉低意大利、西班牙等問題國家的債息。
可以用「半杯水」來形容歐盟峰會的協議，看你怎樣看，看那杯水是半空還是半滿。樂觀派形容歐盟邁出重大一步，既容許歐洲救市基金入市，又有望成立監管銀行業聯盟，即可令歐洲銀行業止血，也可以頂住歐豬債的跌勢，這些措施推出後，歐洲國家有望碌過危機(Muddling through)。悲觀派會形容歐洲又用貼膠布方式救危機，不過今次的膠有大塊一點而已，等危機一穩定下來，好多嘢又會走樣，即使銀行業聯盟都唔知會搞出乜，想要歐洲銀行業全面的存款保障和包底，幾難啦。
經濟滑坡跌勢減慢
睇內地又係經濟好差，但大家都估阿爺唔忍得耐，又要放水，要在本月再減存款準備金救市。國家統計局在周日公佈，中國6月份製造業採購經理指數(PMI)跌至50.2，到達50的衰退邊緣，從5月的50.4進一步滑落，到7個月以來新低，但數字勝過市場預期的49.8。
歐債危機影響出口，上月PMI指數的11個分項中，新出口定單指數及採購量指數明顯降了3個百分點；但由於PMI跌幅已放緩，預料第3季中國經濟會開始趨向穩定。
股市和實體經濟住住是背道而馳，經濟好走向過熱時，政府收水，股市搶先跌。到經濟轉差時，政府放水，股市就出現一浪浪投機資金，入市炒作，博炒經濟見底。內地上證綜指近期好弱，在上周五前，經歷七連跌，連2200點大關都跌穿埋，朝向2145點的低位進發，拖住香港股市後腿，到上周五歐盟達成共識拉起全球風險資產，內地股市才跟大圍彈。
昨日香港無市內地有市，港股慶回歸休市，食唔到個浪。內地A股朝早造好，但好景不常，全日反反覆覆，上證綜指收市原地踏步，報2226點，升唔夠1點，成交亦唔多，深圳上海兩市總成交只有1257億人仔。
我覺得A股早前弱勢，係反映緊第二季經濟未拉得起的難局，所以升完一浸亦大力回，第一浸偷步炒上者死咗。第二季經濟唔掂，市場等打救，差劣數字勢必令阿爺鋪開第二波的救市措施，第一招是減存款準備金，第二招是減息，到出招前後，內地個市又會好番啲，炒作第三季經濟見底。五六月時港股受歐債和內地弱勢的夾擊，未來若歐債危機稍稍舒緩，內地又再出招的話，港股有機「七翻身」。
陸羽仁
上一頁 下一頁
金融High Tea 舊文
