金手指：今次大家想窮都難 - 孫柏文
香港貿發局代表(左二)今周在伊朗促進兩地貿易。互聯網
噚日淩晨時分，孫柏文未瞓做緊功課。突然彭博資訊傳來關於渣打(2888)嘅最新消息，話佢哋被紐約州金融服務局搞嘅嗰單嘢，會以3.4億美元罰款搞掂。幫伊朗handle 2500億美元，罰3.4億美元，真係平到甩轆。
渣打罰咁少抵到爛
記得以前讀書時，滙2500美元去花旗國，銀行收費都要收十幾蚊美元，如果我單交易都係要罰，不過只罰3.4美元，即0.17%。仲要以前伊朗呢單生意唔係個個敢接，肯做嘅銀行一定可收溢價，真係賺到笑。不過今次只需罰咁少，應該會吸引唔少銀行去一齊做。
邊種銀行？咪我哋香港嗰啲囉。點解？因為噚日淩晨睇完渣打單新聞，就有伊朗新聞社喺佢哋嘅網站irna.ir度，高調報道我哋香港貿發局代表團喺伊朗嘅活動。我哋貿發局嘅中東及非洲區域總監就話：「We announce our readiness for expansion of economic and trade relations with Iran。」即係最少都會實現以前曾特首成日想搞嘅伊斯蘭金融！
港交所搞軍火期貨？
咁我哋有冇人才去吞呢嚿肥羊肉？多唔好講，唔知點解我識好多bankers，家雖然喺唔同行做，不過好多都喺渣打踎過，食過幾年伊斯蘭夜粥，多多少少都應該會學到啲嘢。
不過最眼光獨到，就係當我喺facebook分享呢單伊朗新聞社消息後。資深傳媒人Rapiere兄就留言話：「香港將會由內地貪官洗錢天堂，進級做世界級反美帝國家洗錢天堂，套用煲呔嗰句，今次真係想窮都難。梁振英可以超董趕曾，搞軍火港，港交所(388)李小加推出軍火期貨合約，會展搞世界軍火展銷會……」會展都有份？唔怪得喺渣打被查嘅風頭火勢下，貿發局都高調派代表團啦。
講番炒賣，之前我話過渣打應該仲有得跌，結果又燈咗。記得噚日淩晨渣打消息出時，我就寄短訊畀利世民，問佢點睇。佢話預料之內，佢都喺上個禮拜寫過。不過我就話呢轉真係要服一個高人，世民問邊個，我就寄咗嗰個高人前日寫嘅一篇文畀佢。
篇文邊個寫？就係本報收視最高之專欄作家曾淵滄博士寫嘅，條題係「大事化小渣打值博」。投資市場，分析得啱，時間掌握更重要，因為Keynes曾經講過，市場非理性可以長過你捱得嘅時間。利世民雖分析正確，不過跟曾淵滄博士買，唔使24小時就賺近5%。如能日日複式咁賺，就不得了！所以我同利世民話，唔怪得曾博士文章收視，比我哋兩個加埋嘅高。
仲有，噚日淩晨渣打有結果後，我即時已經喺我《骷髏會》個blog同facebook度話：「競價時段瞓身買渣打！ 」仲要建議喺噚日倫敦開市後放。有跟嘅人，就如果放早半小時，其實一轉daytrade已成功，不過差嗰幾十分鐘，咁就倒輸，我真係俾自稱全球最屎trader嘅Jim Rogers更屎，明燈即係明燈。
聽日，我之前以「一注獨贏」型式推介過嘅珠江鋼管(1938)將會出業績。如果想睇我個即時分析，就去我個《骷髏會》blog或喺facebook訂閱subscribe。
孫柏文
獨立股評人
http://www.facebook.com/shuen
本欄逢周二、四刊出
上一則: 創業作業：純粹睇錢，值得創業嗎？ - 宋漢生
下一則: 曾淵滄專欄：港鐵要靠溱岸食糊 - 曾淵滄
~TITLE_S~金手指 - 孫柏文 2012年8月16日 舊文
