青心直說：如何穀大QE3威力 - 胡孟青
熱帶氣旋啟德打到嚟，坊間流傳今晚10點掛八號風球，孰真孰假，不得而知，最準確指標應該係留意貨櫃碼頭宣佈幾點停止吉櫃交收。至於港股，眼見第二度衝20300點關無功而還，9RSI更配合阿茂都識嘅雙頂出現背馳，投資者索性自暴自棄繼續炒幾百點上落。
根據傳統熊市見底理論，當投資者對壞消息冇反應，個市才叫做跌完，因為屆時人人都已哀莫大於心死。
避險情緒或再現
市場焦點雖在藍籌業績，但亦關注月底美國Jackson Hole央行年會，伯南克會否翻炒2010年的QE2，推出QE3。
不過，當市場已對有關因素廣泛預期，其影響力自然衰退，反而擇日不如撞日。當9月12日德國法院對ESM可行性裁決，可能觸發全民公投，再巧遇美國聯儲局議息會議，將會成為大市借勢發圍的更佳理據。
假如我係德國，每年可以踩住歐債危機、借助歐豬國降評級及歐元弱勢多賺近千億歐元，打死都會把死線往後推，最緊要係聽日唔係末日。
保爾森與索羅斯逆市加碼買黃金，未必可成為絕對指標，但金價由2月底近1800美元高位跌至5月中1530美元水平，已累積15%跌幅，守穩1580至1600美元水平不破，或食住圓底收集，重見1630至1680美元。
加上道指及標普500指數於13200點及1400點關前已疲態畢呈，10年期國債孳息將受制於1.75厘，只要美滙指數守於81.3之上，邁向88的旅程料將持續，即意味着投資市場仍將會再出現刺激資金避險的因素。
凡事冇絕對，惟有漁翁撒網，睇得緊啲。
胡孟青
獨立股評人
上一則: 財智語陸：滙市穩危機未重臨 - 陳永陸
下一則: 投資的天空：待形勢明朗始出擊 - 張士佳
青心直說 - 胡孟青 舊文
