中環在線：樓市升定跌？地產大孖沙鬥玄 - 李華華
恒隆地產(101)主席陳啟宗經常語出驚人，噚日喺業績記者會上預言本港樓市最壞時間未到，「黑暗時期仍未來臨」，但轉頭又話唔係睇淡個市！華華睇番幾位地產商老闆近半年對樓市嘅評論，發現大部份聽完都係唔知佢睇升定睇跌，仲玄過財經演員嘅評論！
誠哥最穩陣
地產老闆要賣樓，講親樓市前景一定唱好，樓價閒閒地升5至10%，唔通唱淡等啲人遲啲先買樓，倒自己米咩？但近年個市真係比較反覆，部份老闆都唔會盲目估升。
恒基地產(012)主席李兆基(四叔)之前直情叫人買地產股好過買樓。齋講樓市，四叔認為未來住宅供應多，樓價唔會升得太多，但家建築成本高，樓價亦好難跌喎！
「梁粉」新世界發展(017)主席鄭家純早排幫CY解圍，不停話新政府唔會打壓樓市，但要增加供應。根據經濟學原理，供應增加，價格下跌，咁政府唔使真係出手打壓，個市都可能要跌，純官究竟睇升定睇跌㗎？
都係長實(001)主席李嘉誠最穩陣，佢唔估升跌，只叫人量力而為，買樓自住一定冇錯。華華認為，誠哥呢種講法一定冇錯至真，總之就係叫人買樓，費事估錯方向，將來俾人翻舊賬。財演真係要向誠哥多多學習。
李華華
mailto:LiWaWa@AppleDaily.com
上一則: 內銀撐地方融資平台
下一則: 中環在線：滙豐主管過檔恒生 - 李華華
中環在線 - 李華華 舊文
