青心直說：債息七厘咁筍？ - 胡孟青
有老行尊說︰「我睇唔明，I stop trading！」由於眼巴巴看着近五分之一，即兩成在本港上市股份，於過去短短個多月內，以種種理由發盈警，實在覺得極之冇癮，老行尊遂作出以上結論。只有部份如太保(2601)及信義玻璃(868)不發不知原來只屬假盈警，盈利已在改善中，出現首個拐點。身為高手且對國情瞭如指掌的老行尊，也對港股失望，我等凡夫俗子還可也文也武嗎？
隨時輪到港交所盈警
正如6月才上市的東吳水泥(695)，竟在上市個多月即發盈警，直情係創舉，看來香港又多了一個第一。香港這個一向引以為傲的國際金融中心究竟是否在作死？老行尊話好擔心見到連港交所(388)都隨時要發盈警！
既然如此，自己的投資成績又如何？答案係一樣要輸，輸足兩成，算少喇！自問投資市場如斯景況，真係冇信心會買到一隻可以賺100%的股票，但就極有預感隨時中伏、買中跌五成的股票，就算識睇行業，都唔敢話看得通上市公司本身。你在明、佢在暗！結果係，好多有銀両者，竟來一個Hand-brake turn，在對債券市場毫無認知下急速掟個靚彎、順勢飄移至票面息率十幾厘的企業債券，最頂癮係有說連股票經紀都學人賣債，仲要好好生意！究竟你們在賣債之時，懂不懂甚麼是Duration Analysis？
低息環境，Yield Seeking就是王道，已變成金科玉律，一天未有首宗違約或脫息事件發生(希望不會發生)，投資人仍浸淫在一片歡樂氣氛之中。賣債與買債一方，究竟又知唔知IG(Investment Grade)及HY(High Yield)是代表甚麼？冇評級的企業債，HY一切講個信字！有評級企業債息率回報望塵莫及，只因本身係IG。
也許，老行尊話「七」係一個好重要指標，通脹2厘，不勞而獲都竟然有另外5厘回報，靜坐收息都發過豬頭，當真咁大隻蛤乸隨街跳？
胡孟青
作者為獨立股評人
上一則: 財智語陸：滙控包袱多咪亂掂 - 陳永陸
下一則: 投資的天空：升勢隨時到尾聲 - 張士佳
青心直說 - 胡孟青 舊文
