投資的天空：升勢隨時到尾聲 - 張士佳
港股昨升逾200點，已連升四日，並站在坊間視為阻力的250日線樓上，成交亦有所提高，後市似乎一片坦途，不過，根據各種迹象，筆者認為投資者不宜一面倒樂觀。
首先呢幾日都有醜股翻身的現象，好似昨日就有霸王(1338)及國美(493)，兩股皆有雙位數字反彈幅度，反而有批強勢股就唔係好跟得上大市，不善忘的投資者應該記得，以往逢有此類現象，即使非立刻大跌，也預示升勢快到尾聲，可想而知現階段追貨的值博率已大大降低。
公用股持續造好，證明資金進攻之餘，亦不忘防守，顯示最近升勢或只係因為上周初大市連穿幾個支持位，令大部份投資者齊齊轉為睇淡後，來個回馬槍殺淡友。昨日13隻創一年新高的股票中，有4隻係房地產投資信託基金(REIT)，市場明顯追逐高息股，又係另一訊號反映資金的風險取向。
老生常談「升市莫估頂」，筆者提出以上現象，並非叫大家急急腳走貨或做淡，只係想提醒大家，當市場情緒漸趨高漲時，反而應該提高警覺。如期指升穿19900，自己都唔識睇，到時會先行消化再作部署。
與曾卓鋒(寶來證券業務經理)聯合執筆(逢周三、五刊出)
作者：張士佳、曾卓鋒(寶來證券(香港)業務經理)
上一則: 青心直說：債息七厘咁筍？ - 胡孟青
下一則: 外幣兌港元
投資的天空 - 張士佳 舊文
