中環在線：青霞短髮之謎 - 李華華
99年Salon Esprit開張，青霞與邢李㷧恩愛合照。
走馬上任思捷(330)主席嘅柯清輝果真喺三個月內搵到個新嘅行政總裁，仲要係Zara前高層，市場即刻有無限憧憬，希望呢位人兄真係救得番思捷。雖然思捷大股東同管理層家面目全非，但一講思捷，好易令人諗起前大股東邢李㷧。
04年清爽馬尾
11年高貴女神
今年型格短髮
老公鍾情清爽look
華華唔知邢李㷧係唔係同大美人林青霞婚變，但就聽聞佢有一啲特別喜好。好似話邢李㷧鍾意女仔外表簡潔清爽，幫佢打工嘅長髮女同事會自動自覺紥起辮仔，再唔係就保持一頭短髮。唔怪得林青霞一直保持one length短髮，或者全部梳後紥起啦。
除此之外，聽聞邢李㷧亦唔多鐘意女仔着高跟鞋，唔知係因為着高跟鞋行路會發出「咯咯聲」嘈住曬，定係邢李㷧關心女仔足部健康，總之佢身邊嘅女同事通常着平底鞋返工。
邢李㷧為人津津樂道嘅，除咗佢同林青霞一段婚姻，仲有就係佢創造嘅思捷神話。佢一手帶大思捷，思捷02年成為藍籌股後，佢就不斷減持，越係沽貨，思捷股價就越升，07年高峰曾經見過119蚊，直至2010年，邢李㷧沽清思捷，合共套現210億，有咁多錢傍身，咪以為邢李㷧咁就退休嘆世界，聽聞佢仲有私人業務搞緊㗎。
李華華
mailto:LiWaWa@AppleDaily.com
上一則: 兩跨境ETF籌逾55億
下一則: 中環在線：寶哥哥楊受成係friend底 - 李華華
中環在線 - 李華華 舊文
