金融High Tea——續炒壞消息
2012年9月11日
■市傳中移動已經批出首批4G手機定單，中標的中興及中無線，昨日股價大漲。資料圖片
港股和美股都在玩一個瘋狂遊戲，炒壞消息。邏輯是這樣，美國非農業就業職位增長差，聯儲局今個星期決定推QE3(第三輪量化寬鬆)的機會上升；中國工業生產和出口數據，小心阿爺再出重招。
一班中環茶友飲茶，有個講笑咁講，呢個邏輯好似見到自己女朋友(或男朋友)個樣愈來愈差，就拍手叫好，話佢個樣變到咁差就有機會整容整番靚啦！整番靚就會好吸引，咁我哋更加唔好放棄呢個女朋友(或男朋友)啦。
一個芬佬搭嘴，話佢就係呢種傻佬，好似佢無乜女朋友，見到唯一一個坐在佢旁邊的女仔個樣變差，喊住話要整容，佢馬上怕連最後呢件都無埋，唯有即刻追佢。見到中美數據一差個市升，仲要焗住入市追貨，真係怕QE3，因為歐洲無限量買債和阿爺搞基建已升咗一鑊，佢怕萬一QE3整多一鑊，升完唔回直至年底，個業績更加見唔得人，咁就死得。
進口出口都要跌
昨日就係咁狀況，中國繼上周末公佈工業生產者出廠價(PPI)加速回落，連跌6個月，8月收縮3.5%。昨日中國又公佈一堆唔靚仔數據，8月進出口都遠低於預期，增長2.7%，預示未來進口都係低單位數增長；8月進口仲得人驚，下降2.6%；係近期首次下跌，進口差顯示製造業疲弱，無需進口咁多原料。
中國公佈數據後，多間金融機構都調低中國經濟預測，摩根大通將第三季國內生產總值(GDP)同比增速預計由7.％，調降至7.4％，第四季同比增速由7.5％，下調至7.3％，即是跌到第4季都未見底。
不過摩通亦估中國會加大出招力度，除了推進公共投資，未來還會進行結構性減稅，並鼓勵民間投資。佢話最近浙江和廣東省已開始行動，浙江在上月23日推介441個可由民間資金投資項目，總投資達1.18億元人民幣；廣東則在9月初宣佈向民間開放百多個項目可供投資，包括交通、新能源、基建等行業，總計5040億元，項目涵蓋多個行業。
港股睇阿爺股市頭，上證綜指無懼出口數據不佳，繼續升0.3％，炒救市的味道好濃。港股弱少少，都升25點。雖然昨日睇個市上衝乏力，但上周五升咗咁多都無大回吐，成交有590億，顯然有不少補貨買盤。
部份建材股、機械股、有色金屬股被炒高，最誇張係隻洛陽鉬業(3993)，昨日大升22.9％，收3.6元，雖然話佢早排一直跌，比52周高位4.6元回落不少，昨日一挾挾咁多，仲有成億元成交，甚有炒作味。
電訊設備炒反彈
昨日最得意是內地電訊業及相關製造股，市傳中移動(941)已經批出首批4G手機定單，涉及金額高達數十億元人民幣，而中標的手機生產商包括中興通訊(763)及中無線(2369)等，兩股昨天各自漲6.3％及10％，。京信通信(2342)仲誇張，大升14％，收2.29元。
反觀畀錢那個中移動卻要跌0.7％。反映市場認為4G推出，又是一場激鬥，弄不好會再有減價戰，由電話網絡公司大幅補貼手機搶客，所以4G推出無法刺激電話網絡公司股價，但設備和手機製造商就食到應，唔理網絡公司鬥生鬥死，佢哋有理無理做多好生意。中興由去年2月高位近30元，跌到而家得番10元多啲，要炒反彈，仲有一定水位。
陸羽仁
上一頁 下一頁
金融High Tea 舊文
