金融High Tea——跟匯金 換馬忙
2012年10月12日
■中央匯金公司增持中行H股股份，刺激內銀股大發神威，中行昨日升2.7%。資料圖片
港股昨日表現威威，美股杜指上日大跌128點，港股烏雲蓋頂，開市無耐插153點已是全日最低，在內銀股帶動下，好快已經收復失地。妙就妙在跟住內地再跌，但港股都唔係幾想跟，最後內地股市跌0.8％收市後，港股來個大翻身，抽上21000點上方，臨收市略為回順，收20999點，升79點。國企指數仲勁，大漲190點，收10231點，大市成交急升至558億元，較上日增多27%。
港股表現咁勁，純由中資金融股帶動。中央匯金公司增持工行(1398)和中行(3988)H股股份，刺激內銀股大發神威，工行大漲4.3%至4.89元，交行(3328)及建行(939)升愈3%，招行(3968)及中行齊升2.7%。單係工行、建行、中行三隻都已經帶動恒指升112點，可以話昨日升市完全由紅色股金融股帶動，恒生中國H股金融行業指數勁升2.2%。
實盤買貨期指低水
昨日美股跌內地股跌只有港股升，本地股市盡顯強勢，有幾點要注意，第一是期指一直低水40點左右，市強而期指低水，通常被視為負面指標，有時甚至意味抬高現價權重股如匯控(005)及中移動(941)來沽期指。但昨日期指低水，好可能係升市主要在現貨市場對內銀股的買盤而來，唔係源於炒期指的買盤，雖然唔排除升完一浸先回一回，但實盤咁多市底仍強。
第二是呢一浪升市一直坐冷板凳的內銀股大升，主要由匯金公司增持所觸發，匯金是阿爺揸內銀股的控股公司，其實佢過去一年一直增持內銀A股，早兩日工行還公佈了匯金最新增持A股的動作，香港都無乜反應，仲笑匯金揸到成手蟹貨，直至工行和中行宣佈匯金增持了它們的H股，海外投資者才如夢初醒追貨。
第三是早前熱炒的地產股跌內銀升，部份有被基金有換馬沽出的跡象。新世界(017)、恒隆(101)跌4％，信置(083)跌2.7％，新地(016)跌2.2％，基本上係早前愈升得多而家愈跌得多，不排除有基金沽出手上地產股獲利貨，轉入內銀。但地產股早前升得咁急，如今只是合理回吐，若回得深少少，反而係吸納機會。
內銀大落後唔怕跟
至於內銀，有人問我好唔好跟匯金買，我話只要你啲錢唔係等住用，唔怕跟吓，你睇昨日工行大升4.3％，仍然只得6.6倍市盈率，5.1厘息率。建行只得6.7倍市盈率、5.1厘息率。若然你估中國經濟要硬着陸，當然唔好買，若只是回軟，第三季見咗底，第四季會回升，現價唔怕追內銀，因為話佢哋今年都只係盈利增長放緩，唔係下跌，呢啲市盈率、息率相當吸引。
好多強股創了今年新高，但內銀係典型弱股，以建行計，今年3月高位6.62元，而家得5.66元，距高位仍有17％。工行今年3月高位5.72元，而家得4.89元，距高位又係一樣有17％水位，兩者都比恒生H股ETF(2828)和高位14.7％差距大，可見內銀的落後。
唔好假設A股一帆風順，佢仲有可能反反覆覆，我估香港H股會強過A股少少，因為有部份海外投資者已回流香港以至內地市場，早前人民幣匯價一直陰陰跌，是資金怕中國經濟觸礁潛水走人，近期人民幣匯價回頭走強，固然和美國QE有關，也因為中國經濟有少少穩定狀態，吸引資金回流，所以紅色股還可以看高一線。
陸羽仁
上一頁 下一頁
金融High Tea 舊文
