金融High Tea——人取我棄
2012年10月9日
港股昨日俾雙鬼拍門，上午先俾國慶假後開市的內地股市打一巴，下晝再俾歐洲股市插一下，話希臘和到訪的國際三方小組未達成任何救助協議，加上歐盟財長開會在即，德國、法國股市昨日開市都跌超過1％，歐羅亦跌0.5％，搞到港股無晒癮，尾市愈跌愈急，最多跌204點，最後收市跌187點，收報20,824點，成交唔多只有433億元。
長和系出奇硬淨
不過本地股民對內地股市失望較大，經紀張昨日早上好熱情高漲咁期望內地復市開紅盤，開市前我問佢，好似佢咁諗的人多唔多，佢話好多人都係咁諗，想內地帶住港股再衝上2萬1，連帶A50(2823)上周亦已偷炒上。我話咁就死得啦，邊有咁順攤畀你哋食胡呀，結果上證綜指差不多一開就跌。
內地股市下跌的藉口是主板新股發行審批將在國慶假後重新啟動，對後市有壓力。但我就話節前內地股市連漲2日，特別係煤炭股、有色金屬股帶頭升，根本就係大戶事先炒反彈，然後有大批散戶在假前入市博假後反彈，大戶乘機派咗貨出街，所以節後復市突然失去炒作力量，節前帶頭升的煤炭股、有色股昨日一開盤便領跌，打到散戶潰不成軍。
呢個又一係一個經常重演的教訓，當人人都話得的時候，就係人取我棄的時候，炒國慶後紅盤如是，炒農曆年開紅盤也如是。
不過跌市亦睇到乜嘢股強啲，除咗油價下跌受惠的股份之外，和黃(013)升1％，煤氣(003)升0.8％，佢哋都有較強抗跌力，而和黃同系長實(001)亦只跌0.3％，好多其他地產股都要跌2％以上，唔知長和系點解咁硬淨，我有少少懷疑個市向好，佢哋係唔係有啲嘢搞緊。
另外一單新聞又涉及中美口水戰，彭博通訊社引述美國國會一份報告指控，中國的兩大電信設備製造商華為和中興通訊(763)，被指涉嫌在美國為中國情報部門，搞間諜活動，叫美國公司唔好用佢哋的電訊器材。
其實在總統選舉這一段期間，美國有好多針對中國的新聞，兩個總統候選人都在電視廣告中批評中國造假或搶走美國人飯碗，這些針對華為和中興通訊的言論，都好可能同競選活動有關。
小心中興調整未完
由於華為的大老闆是前解放軍軍官，更是美國頭號針對對象，最近華為有合作項目在美國被叫停，華為仲未上市，似乎想用上市的方法，增加公司透明度，減少爭議，傳聞仲要首選在美國上市。我估老美要插你，唔理你在哪裏上市，都一樣可以插你。
中興昨日受消息影響，起勢咁跌，午後跌幅加大，收市下跌6%報12.6元。佢在9月頭由一年低位9.23元起步，一路炒上，上個星期升到高位13.5元，其實已升咗46％！上周四、五連續兩日見雙頂13.5元不破，本來都要調整，遇上呢單嘢跌得更甘，但小心佢升咁多調整唔係一日就完，我估要反覆跌深啲，即使保住上升軌，都可能穿埋12元，先有機會搵番個短期底，要買唔使太急。今次唔係單新聞殺傷力大，只係中興咁啱升得多要回。
阿爺有長期目標，好似電訊咁重要的行業，在技術上要追趕外國。所以即使無線電話的制式，佢都要開發自己的TD制式，雖然而家仍然被人彈到七彩，但仍然希望慢慢發展起來。係人都知中國做廠係血汗生意，佢都想做科技厚利生意，不過就唔係咁容易達得到頂尖地位啫。
陸羽仁
上一頁 下一頁
金融High Tea 舊文
