金融High Tea——溫水煮淡友
2012年11月2日
熱錢持續流入香港，金管局連續兩日向銀行體系注資共超過54億港元，令銀行體系結餘預測增至1684億元。上月下旬至今，香港金管局已六度注資，涉及金額合共197.87億元。不過樓市近期水淨鵝飛，港股交投都唔見得好旺，來來去去都係五、六百億水準。熱錢流入唔知去曬邊。有分析指可能透過某些地下管道流入內地趁低炒股。
資金流入的速度，至今仍然緩慢，每日只係幾十億，欠缺洶湧氣勢。不過，中環茶友話，美國現時採取的量化寬鬆，係每個月都會維持的操作，即係個個月都會印銀紙，令銀根不斷放寬，在央行未放變方向錢，水浸情況會一點點加深，不知不覺浸晒成個市場，浮起資產價格，係咁環境下，若然你同聯儲局對抗，賭資產價格下降，就會好似跌咗落溫水的青蛙，隨時被人煲熟。
呢個情況係昨日就睇到，港股本來起步脫腳，指數低開，但好快跟住A股反彈。之後一路順風順水，升近全日最高位收市，收市倒升180點，高低相差接近330點。國企指數再度跑贏大市，升119點，大市交投只有587億元，反映啲水唔係咁多，就幾吋已經可以浸死人。
小小水浸死人
收市後經紀張打電話來，話今次錯過食胡機會，本來上月尾買咗張期指，點知臨尾被大戶震番出來。我話表面睇，呢兩日個市係借政府打樓價回調，但如果睇番期指表現，上周尾已經開始有異動，好明顯係大戶想殺一殺好倉，跟手先再挾番淡友，不過，以而家形勢，做淡友真係要小心。
大市造好主要係借中國10月份製造業採購經理指數(PMI)，比上月上升0.4個百分點。數字連跌四個月之後第二個月上升，主要係重新回到枯榮線之上。
內地經濟好轉，中資金融股繼續反彈，續領跑大市內銀「九行」全線向上，國壽(2628)及太保(2601)齊漲超過2%。
建材股表現同樣標青。中建材(3323)季績遜預期，純利按年跌29%至16.9億元；不過高盛認為雖然水泥價格大跌，但中建材受惠於水泥銷量增長31%，令收入得以維持。
高盛話中建材主要營運地區如中國東部及南部，自8月底以來水泥價格領先水升。由於內地基建需求增加，預期水泥價至12月仍將持續上揚。高盛認為首季股價出現回落為入市機會，將水泥列為選擇子板塊。維持中建材「買入」評級，目標價10.3元。中建材昨日勁升超過半成至10.38元，升穿高盛目標。其餘建材股亦有唔錯升幅，當中中材股份(1893)與海螺(914)升約5%、台泥(1136)及聯合水泥(1312)漲超過6%。
中資成主要概念
由於睇好內地經濟同人仔匯價，中資股成為主要概念，內房股近日表現不俗。早前完成轉讓資產俾旗下房託的越秀投資(123)昨日再升，創出今年新高。「do re mi」趁大陸樓市呆滯的機會，把投資物業廣州IFC注入旗下的越秀房託，釋放資產價格之餘，仲套現大筆資金，近日公司不斷增購地皮，足跡不止在於廣州。
有熟悉公司的朋友講，內地國企講級數，越秀過去輸蝕在級數只係市企業，係融資借貸上比其他國企內房公司條件差，而家仲哋諗出咗將投資項目注入房託套現呢招，增強咗係水緊時期吸資能力，可以低價搶地，增加咗對內地房地產有信心的資金興趣。
陸羽仁
上一頁 下一頁
金融High Tea 舊文
