金融High Tea——收夠籌
2012年12月28日
■今日掛牌的中國白銀集團，暗盤曾報1.25元，較招股價1.18元高約6%。右二為主席陳萬天。資料圖片
內地A股連升3日後，昨日先升後回，調整幅度唔算大，上證綜指跌13點至2206點，收市仍然企穩2200點上方。成交繼續擴大，上海深圳兩市成交增加至1961億元人仔。港股則價升量跌，恒指升79點至22620點，全日成交收縮至只有416億元。
市場主要炒作大陸管理層繼續放水，現時採取的最佳方法係透過逆回購操作補救市場資金缺口，昨日央行推出共計1580億元逆回購資金。中資金融股成為推動港股向上的主要動力。恒生中國H股金融行業指數大漲1.2%，遠遠拋離其他板塊。 內銀股及內保股全線向上，其中招行(3698)及民生銀行(1988)表現最好，齊升超過2.7%。今日掛牌的江西白銀生產商中國白銀集團(815)，暗盤曾報1.25元，較招股價1.18元高約6%。另一隻掛牌股份惠生工程(2236)就無乜成交。
內地股市勢好，港股預期高開，但之後升幅唔多，相信主要係基金今年已經收夠籌，等收爐心態好強，有乜寧願等下年先做，市好就沽番啲賺得多的股份出街，鎖定吓利潤先。
中國銀行業協會發佈了 《中國銀行家調查報告(2012)》。該報告指出，70%銀行家預期未來3年銀行收入及利潤增長率將細過20%
內銀爭中小企客
有分析指出，中國自2008年起，信貸每年以八萬億左右規模的速度遞增，即使以12%的信貸增長速度來測算，未來十年資本的補充壓力仍然較大。銀行業需要大力發展資本節約型業務，注重提升非信貸資產佔總資產的比例。
報告又指出，半數以上的銀行家預期銀行未來3年不良貸款率將維持在1%以下，壞帳集中於房地產及地方政府融資兩瓣。有超過六成銀行家表示應收縮地方政府融資平臺規模，好多人仲預期部份地區會出現違約，原因係今年經濟不景，地方財政收入增速下滑，導致政府還款能力下降。
隨着中國利率走向市場化，銀行同業競爭日益激烈，各間銀行都在加速轉型和調整策略。業內人事估計，中小企業信貸將是一個重要突破口。
內地銀行集中片取中小企貸款，唔單係響應政府號召，而是大勢使然。過去在沒有那麼多資本約束的情況下，銀行只願服務大企業、專做大項目。但客戶愈大，項目愈好，議價能力就越強，相對收益率就愈低。所以，好多銀行都轉向討價還價能力較低的中小企。
涼茶大戰打得甘
講開好賺，廣藥集團旗下的王老吉，賣涼茶賣出彩虹，變成價值近千億元的品牌。年前廣藥向授權生產的加多寶收回品牌自己做，市場仲因此憧景上市的廣州藥業有注資，股價連番炒上。不過，生產開紅罐王老吉的加多寶也不是省油的燈，在失去授權後狂掟銀彈催谷紅罐涼茶，仲搞到同廣藥連番官司。
早前廣藥提出的「禁令」申請，昨日在廣州中級人民法院舉行聽證會。廣藥要求禁止加多寶使用「全國銷量領先的紅罐涼茶改名加多寶」一類廣告語，加多寶方則請求法院駁回廣藥申請。
無論今次訴訟結果係點，加多寶過去經營紅罐王老吉，同印銀紙差唔多，現在失去印鈔機器，當然不會善罷，所以炒廣州藥業的股民要牛咁眼睇完呢場涼茶大戰點收科。
陸羽仁
上一頁 下一頁
金融High Tea 舊文
