金融High Tea——伸手伸唔死
2013年1月18日
■《施政報告》無打擊炒樓措施，又無八萬五那種嚇人大製作，好多人又話要買樓。資料圖片
港股繼續享受《施政報告》刺激，主要係地產股最受惠，既然二手樓業主見《施政報告》無打壓就加價，地產股都唔執輸升番吓，表現最好的長實(001)續升1%，繼續創52周高位。
屯門癲價得人驚
港股應該都係炒地產股，所以一開市就抽，但內地唔生性，A股反覆向下，拖住港股高開低走，內地股市上證綜指跌1.1%，港股下午逐步回穩，收市連續第三日下跌，但只是微跌17點，收23340點。近排都係阿爺回得多，港股跌得少，內地股市今日期指結算，唔知過完結算會唔會好番啲。
見到振英哥《施政報告》無打擊炒樓措施，又無八萬五那種嚇人大製作，好多人又話要買樓。我就話政府發狂咁刮地皮，雖然市場無信心呢啲地最後全部可以攞到出來，但政府左搞右搞，幾年後供應大增的事實似難改變。最可能的情況是政府永遠慢半拍，在呢一兩年房屋需求多時，供應唔夠，到幾年後利息加番需求無咁大時，供應一湧而出，買樓的朋友要預咗有此結果，預咗到時樓價若回落，自己頂得順至好買。昨日見屯門二手樓實用面積9000幾元一呎成交，估計建築面積都要近8000元一呎，間樓睇落好舊，呢啲真係癲價，用家有少少恐慌性入市，長線真係唔知點支持到呢啲高價。當然，短線而言，升開有條路，樓價高處未算高也。
市況旺咗，上市公司會伸手集資。恒大(3333)前日公佈，配售10億股，配股價4.35元，較上日收市價4.65元折讓6.5%，集資43.5億元，有關的股份將設有三個月禁售期。
大折讓配售自然令股價受壓，最低插到4.3元，收市都在近低位4.32元收市，跌幅7%。恒大急挫，連累其他內房股。富力(2777)跌3.2%至14.3元，合景(1813)沽壓更大，跌近4%，收5.9元。
恒大今次伸手，我又唔係睇得咁負面，雖然股民比較喜歡公司發債而非批股集資，但恒大六月底時負債比率96%，估計去年底降至70%左右，若再發債，負債比率又會回升。去年中期業績後公司曾表示要降低負債比率，若最後降唔低難以交代。
恒大早批早着
聞說恒大配股中有30億用作還債，公司在2010年發行2015年到期的13厘高息票據，總金額58億港元，其後再加碼，試想佢用批股集資回來的30億，去還高息債，一年都節省4億利息支出，唔係少錢。
當然批股有攤薄每股盈利的影響，而且股份批予對沖基金三個月解禁後，股價會更波動，有人懷疑恒大咁急批股係唔係睇淡大市。但我就話，批股係早批好過遲批，恒大並未炒得太高，批股對股價傷害有限，唔知大家記唔記得，恒大在2009年上市，當時招股價3.5元，第一日炒上4.7元，三年過去，股價原地踏步。恒大批股集資，伸吓手唔會死，強化資產負債表，反是好事而非壞事，早集資仲着數，只要佢業績無大問題，呢一浸忍吓手等佢回深啲，反而係低吸短炒的機會。
陸羽仁
上一頁 下一頁
金融High Tea 舊文
