金融High Tea——掟得就掟
2013年4月3日
昨日港股升68點，但係唔好睇大市有升幅，好多紅色股跌到七個一皮，有啲因為業績唔好，有啲成個行業咁跌，例如太陽能或風電等，走資情況相當嚴重。另外壹傳媒(282)台灣賣盤不成亦大跌26%。
有啲公司業績麻麻，芬佬出貨情況明顯，例如隻第一拖拉機(038)，昨日插9.3%，估計原因是佢公布去年業績，賺3.5億元人民幣，跌20.7%，更大問題是佢去年中期仲賺2.9億，仲升5.6%，好粗略咁計等如去年下半年得番6270萬盈利，下半年回得好快。
賣農機的一拖唔得，賣起重機等重型機械的中聯重科(1157)亦唔掂，去年純利下降9.1%，比市場預期的數字低15%，佢去年上半純利仲升21%，又係下半年唔掂，海通證券(6837)話，中聯重科主要是四季度收入大降31.7%，又增加資產減值撥備5億元人民幣。中聯重科昨日大跌10%至8.43元。海通雖然維持中聯重科「買入」評級，但目標價就由12.1元調低至10.6元，等如今年盈利預測市盈率8倍。
機械股無隻得
相對之下，搞壓路機等基建機器的龍工(3339)股價昨日又係插11%，跌至1.57元，佢就跌得「抵」啲啦，因為龍工去年核心收益下跌88%(遠較一拖跌9%多)，較市場預測的數字少68%，不過龍工早有盈利下跌趨勢，因為龍工去年中期盈利已跌76%，市場對佢全年純利下跌有啲心理預備。美銀美林話，龍工利潤下跌，主要因為行政支出及呆帳撥備高所致，佢下調龍工今年盈利預測34%，下調明年盈利19%，目標價因此下調10%至1.8元，評級「中性」。美銀美林話上月內地挖掘機和裝載機銷量跌幅收窄，今年第二季可重拾增長，但相信增幅將溫和。
睇完幾隻機械股的業績，你就知去年內地賣乜嘢機都唔掂，差在跌得多定少。?家就要賭佢哋今年上半年業績會唔會復甦。
睇番昨日大市，港股次季第一個交易日，恒指低開97點，隨即勁升246點至22450點，倒升149點。當好友大以為恒指今日可以挑戰20天線，內地A股腳軟，拖累港股跌番落嚟，中午倒跌約30點。至內地股市收市後，恒指才鬆綁，收市回升69點，收報22368點。國企指數就繼續無運行，大幅跑輸恒指，逆市跌85點，造10811點，大市成交只有601億元。
頂住大股出貨
昨日港股表現唔靚仔的地方是成交少，下跌的股票超過700隻咁多。恒指能夠收復失地，全賴兩隻重磅股匯控(005)及中移動(941)力撐，有點托住派貨感覺。
匯控股價朝早抽高後保持硬淨，收市升1.2%，報83元。另一巨股中移動升0.7%至82.75元，奇就奇在中資電訊股除中移動外，全線向下，其中中聯通(762)跌近2%。主要原因係有報道指民間資金進入電訊業方案的正式稿和細則制定已經完成，而中移動已開始開展移動通訊轉售業務，預期競爭加劇。
另外，頂住大市的還有地產股。內地傳媒報道，國五條地方細則公佈，好多城市的調控力度較預期溫和，德銀指短期政策的不明朗因素消除，維持多隻內房股「買入」評級，首選中海外(688)、中海宏洋(081)、華潤置地(1109)、富力地產(2777)及綠城中國(3900)。花旗則建議收集高質素品牌之內房股，睇好世房(813)、融創中國(1918)、遠洋地產(3377)及萬科。內房股普遍反彈，華潤置地升超過1%，表現標青的是世房，大升超過5%。
內銀股係拖累大市的主要力量。中國H股金融行業指數大跌1.4%。主要係受中信行(998)大跌超過6%拖累。中信行大幅撥備547億元人仔，令到去年獲利只有310億元，按年輕微增長0.7%，遠低過市場預期，被高盛唱淡，評級由「中性」降至「減持」，目標價由5.3元下調至4.4元。花旗亦下調其2013/14年財政預測10%及3%，評級由「買入」下調至「中性」，目標價由6.3元下調至5元。中信行昨日收4.38元。比較細粒的內銀股跌幅較大，民生銀行(1988)亦大跌超過4%。過去一兩年外資興推介中小型內銀股，相信睇完業績，未來又會回歸大股。
陸羽仁
上一頁 下一頁
金融High Tea 舊文
