超人心淡
2013/8/12 8:23:21
網誌分類: 經濟
美股上周五再回，杜指跌72點，但跌勢未算太急。全星期計杜指跌1.5%，已是6月以來最差的月份，但全年計仍升17.7%，標普500指數上周跌1.1%，全年計升18.6%，美股仍在大牛市中。
達拉斯聯儲銀行總裁費沙(Richard Fisher)話，如果經濟數據繼續良好，聯儲局好大機會在9月開始收細賣債規模。Wilmington 信託投資顧問公司的 Cam Albright話，現時的假設是9月係聯儲局可能開始收水的日子，除非8個月有非常令人意外的悲觀數字出現。佢認為市場未接受量寛政策突然停止，所以一個慢慢收水的方式較易被市場接受。
最近留意到一個變化，就是李超人好像對香港(甚至大中華投資)有啲心淡，或者有啲悲觀，現象一是早兩年先以信託形式賣走珠三角碼頭的九成股權。現象二是不斷加大英國等外國的投資。現象三是傳出和黃要賣百佳的消息。現象四是李超人不再在中期業績出來講話。現象五是他連在股市大跌時也懶得增持長和系股份。
增持呢一項可以詳細再睇睇，睇番啲報道統計，由去年7月開始，李超人只在今年4月增持了長實及和黃各一次，共用了1億元左右，是2003年以來增持得最少的一年。李超人曾話過，他對長和系的股份只買不賣，因此增持多寡不單是反映李超人對大市是否沽過籠的評估，更可視為他對集團以至香港前景的信心。
若論關係公司前景的因素，和黃係環球企業，生意受環球經濟所左右。長實既係控投公司，又係地產公司，生意好受本地地產市道的影響。李超人睇淡本地的地產業，眾所皆知，現時長實的借貸槓桿率只有3%多一點，可以說是極低槓桿，若對地產市道睇好，借咁少錢買地未來一定落後他人，所以只能解讀為睇淡地產業。政府不斷出辣招打擊樓市，樓市好似中咗毒一樣，在高位呆咗，只有300、400萬以下的細價樓仲升，其餘好多大碼樓唔減價根本無法成交。長實賣樓以量為主，賣價較貼市，本來抗跌力較大，但呢啲呆滯市道，佢都唔係好掂。
除了樓市差之外，我估超人心淡的原因還包括:第一，和新政府關係不好。第二，新政府頗多反商業的決策傾向。第三，本地經營成本高漲。第四，本地有不少針對他的批評。
可能有人會話，李超人唔喜歡香港咪走囉，佢唔做有人會做。這是事實。不過香港如今已在商業經營的高原上，也是事實，生意唔升成本升，往後做生意的盈利走勢係向下易過向上，縮手的人慢慢會多過沾手的人。我睇到有個調查係上一季打工仔對香港就業信心係近年新高，我估都係到居安思危的時候了。
陸羽仁
回應(0) 我想回應
陸羽仁 BLOG 舊文
