情緒事件
2013/11/8 上午 09:43:58
網誌分類: 經濟
Twitter新上市炒翻天大升73%，但美股卻大插水。美股昨日先高後低，杜指朝早創歷史新高(15798點)後，節節下挫，收市倒跌153點至15594點。標普500指數跌23點至1747點。跌得最勁的是納指，大跌1.9%，其中蘋果跌1.6%，Facebook及亞馬遜大跌超過3%；中國概念科技股更出現恐慌性拋售，霍特中概股指數跌幅超3%，奇虎360插7.6%。中概股太陽能板塊跌幅仲大，其中尚德電力(STP)跌超過30%！難道泡沫開始破裂?
邊廂Facebook及亞馬遜大跌，那邊廂科網新股Twitter就炒翻天，佢昨日上市掛牌，定價加完又加，加到每股26美元，開市即抽上45美元之後橫行，走勢淩勵。收市只係輕微回順至44.9美元，較定價高出73%！
大市受經濟數據影響，盡管消費和企業開支的增長放緩，美國經濟的底氣依然不足，但出人意表地3季度GDP增速提升至2.8%，大大超過市場預期的2%。另外，美國最近一周首次申領失業金人數較上周降9000人至33.6萬，略高於市場預期的33.5萬。美國第三季經濟有高過預期增長，但基本面仍然疲弱，有解釋GDP之所以意外地標高，主要原因係企業重新充實庫存所致。美國今日將公布10非農就業報告，如果數字唔係好靚仔(估計都唔會)，就解釋了聯儲局點解遲遲都唔敢啟動退市機制。
再睇埋歐洲央行突然把融資利率降低0.25個百分點至0.25%，反映歐元區領導人亦睇唔好未來全球經濟環境。分析界普遍認為聯儲局最快都要明年初才可能決定採取退市行動。
不過，投資者就有理無理，見經濟數據好過期，就驚聯儲局會提早退市，對股市前景大為恐懼，股市恐懼指標VIX指數抽高近8%至14點邊緣的近期高位。
近期藍籌股、「明星股」，即使業績好過預期，投資者都唔多感興趣，皆因資金蜂擁入炒新股行列。10月美股有33隻新股上市，抽走了120億美元。今個月第一個星期，已超過10隻新股上市，但係Twitter上市已經搶了超過31億美元。
現在的科網熱好有2000年科網科爆破前夕的味道。不過有分析指出，整體爆煲的機會仲未係好大，1999年及2000年，中型的新股定價一般都高過去年銷售的25倍，營業額亦少過5千萬美元，而近年，屬這類型公司，少過四成。而隨著網科市場不斷成熟，好多公司已經實質生意，有盈利，唔係得個概念。當中的新股亦不乏有盈利前景的好公司，只係在瘋狂搶購下，上市當日的股價已經反映了全年的盈利增長。
令人憂慮的情況係，投資者現時搶購新股，其實無理間公司究竟有冇盈利。例如Twitter，如果認真計數，睇盈利買Twitter就係一個絕對差的投資，Twitter定價26美元，市值18.2億美元，已經遠遠超過Macy(市值13.3億美元)、Harley Davidson(市值14.3億美元)，問題係，這些老牌公司都賺緊錢，而Twitter到目前連一分錢都賺唔到，今年上半年仲蝕緊接近7千萬美元，估計要到2015年至可能賺到錢。唔買Twitter買Google或微軟穩陣少少。
ZT Wealth的首席經濟師Max Wolff話Twitter上市係情緒事件(emotional event)，唔係基本因素事件(fundamental event)，不能比較。總之有Fans，股價就有得升。問題在於你信唔信？如果有Fans就得，Facebook有超過Twitter5倍的會員，上季仲大賺特賺，點解投資者唔買Facebook？走去炒Twitter？答案係一個炒字，新股無蟹貨嘛。科網泡沫已現，未爆，只是未夠顛而矣。
陸羽仁
回應(7) 我想回應
陸羽仁 BLOG 舊文
