三中敏感症
2013年11月08日
美股再創新高，但港股依然無運行，而且早段仲跌得幾急，弱勢都可以話相當明顯。港股咁差主要係受金融股拖累，其他類別反而只係上上落落。
金融股差有兩個原因，本地銀行股回軟，主要係受匯控拖累；另外中資金融股再度成為拉低大市的元兇，結果兩地金融股幾乎全軍覆沒。
美股升、港股跌，散戶難免再度失望。杜指前晚再創新高，點知恒指仍低開，早段在兩萬三爭持，隨後沽壓突增，港股跌幅擴大至217點，當時氣氛幾差吓，好彩22800暫見支持，大市跌勢放緩，恒指收報22881，跌155點；國企指數收報10474，跌87點或0.83%。
匯控跌得合理
匯控(005) 唔靚仔，市場解釋係涉及違反歐盟反壟斷規定，可能被歐盟罰款高達495億元的消息逐漸發酵，上日股價還頂得住，昨日終於回軟，跌超過1%至85元水平。恒生(011) 及渣打(2888) 同跌約1%。
不過，陸羽仁係大笨象宣佈業績之日已經講過，美國銀行股去年表現標青，今年顯然高峰已高，炒極都炒唔起，主要係大氣候未有改善，美國銀行業息差仍然偏低，影響邊際利潤，銀行已經變成落後股份，華爾街創新高，全都係靠其他類別股份撐起。匯控早兩日公佈業績麻麻，但股份夾硬炒上，無地球係有地心吸力者，業績麻麻的股份，係好難勉強升上去，昨日回調只係合理反應而已。
中資金融股下跌，陸羽仁認為可以用三中敏感症去形容。內地媒體報道，10月份國有四大行新增貸款投放量只有約1820億元人民幣，較去年同期減少近400億元，創了年內單月新低。業內人士估計，10月內地金融機構整體信貸投放預期約在5000億元至6000億元人仔之間，即係話市場相信內銀下跌，係同貸款增長疲弱有關。
分析指新增貸款放緩原因，除了季節性因素影響以外，係與四季度貸款額度相對緊張有關。至於存款方面，全個行業存款增約2,800億元，而四大行眾存款仍然出現負增長9700億元。但負增長幅度有所放緩，較去年同期少降500億元。導致存款流失的主要原因係季初存款回流理財及非銀行同業。四大行生意上個月做少咗，自然就挨沽。工行(1398) 、建行(939) 、中行(3988) 及農行(1288) 齊跌約1%。
內銀變孱仔弱不禁風
陸羽仁睇法係，貸款增長一個消息可以推低內銀股，反映呢個板塊體質虛弱，變成弱不禁風，一有異動就即係碌低。點解內銀股會咁孱呢？主要係市場傳仲有兩日就召開的三中全會，會大力進行改革，下放企業權力，加強市場機制，屆時利率可能迅速自由化，令國企好快面對民營銀行競爭，以及面對息差大減，由於大家預期市場環境大變，個個一有小小負面消息，就即係掟貨，使到內銀成為孱仔股。
按正路波講，中央就算要加強競爭，都會採取循序漸進方式，不想一下子搞死國企銀行股，須知內銀家家都係巨無霸，控制住數以十萬億元計存款同資產，若然佢哋出事，肯定對經濟帶來好大衝擊，中央不會不知道相關影響，任由一開閘就撞死幾家大銀行。不過，由於市場氣氛係咁，個個寧願先靠邊站，變成一有人沽貨，就因為承接力薄弱下跌。通常呢種情況要等到出現大超賣，就可能趁消息無想像咁差時來個反彈。
陸羽仁
金融High Tea 舊文
