熄機背後
2013年11月21日
港股昨日開步與上日差唔多，高開後回順，但走勢明顯較為硬淨。內地政策陸陸續續出台，斷估未有咁快玩完，高盛昨日就出報告預期後市走勢以偏好居多，不過要留意阻力位，約24000點。
受惠國策的內險股，升勢延續，國壽(2628) 由上周三的20.5元起步，連升5個交易日至昨日最高24.75元，累積升幅達兩成！即使金融改革長遠不利內地銀行，內銀股期間亦唔執輸，例如建行(939) 累發脹近一成，早排投資者擔心內銀股受國策衝擊，無理佢哋估值已跌到好平，若然頂唔順係當時跳船，就變成了低位沽貨。
公佈沽空變燈神
中資股偏好，港匯近日續強，令港股重返23700收市。恒生指數收報23700，升43點；國企指數收報11437，升71點，成交縮減至705億元。
市況活躍，有報道指正在招股的鐵礦開採商「恒實礦業」獲三位基礎投資者入股。除周大福(1929) 及玩具大王蔡志明外，還有西京投資的主席劉央。此前有消息稱，劉央正洽購四隻將公開招股的新股，行業包括醫療保健及科技網絡企業。
有「女股神」之稱的劉央，去年至今參與認購5隻新股，其中人保(1339) 走強，伊泰煤炭(3948) 上市至今大漲逾六成。今個月8日掛牌的普華和順(1358) 較招股價累計升逾16%，劉央認購了集資額的10%，帳面賺了近2000萬港元。
不過，她在上周高調話港股「跌一成都不足為奇」，宣佈開始沽空港股，之後一個星期恒指升超過700點，創了九個月來新高。港股周一咁火爆，整個股市雞犬皆升，惟獨是西京投資持重倉的明豐珠寶(860) 發盈警，逆市勁跌近一成。西京投資帳面上蒸發近2800萬元。市場近期唔叫劉央做「股神」，改叫「燈神」，又係「股市唔易玩」又一典型寫照。
掟錢抗熄機 TVB慘勝
無綫台慶被人狙擊，不滿政府發牌政策者發起「萬千熄機賀台慶」，叫觀眾熄機，對於呢個提議，中環茶友一早質疑有幾多人響應，理由係支持發牌者有兩類，一類係認同理念，支持開放市場的非電視核心觀眾；一類係好想睇電視，希望多的劇集的師奶，前者根本一早已經熄機，後者支持發牌都係想睇電視，你叫佢唔好睇電視，師奶會問台慶都唔睇，咁平日睇唔睇，若然成日唔睇，好大犧牲喎，可唔可以搵過其他方式表態呢？
有人話，叫人熄機唔睇電視，呢個玩法好易露底，香港而家成日有爭拗，呢樣反對、嗰樣唔贊成，如果機會成本唔高，參加吓無所謂，若果實牙實齒付代價，就真係要諗過。鼓吹叫人熄機者未必唔明白呢樣嘢，只不過佢哋有人自己都搞緊媒體，唱吓無綫等佢流失的觀眾，點都無蝕底啫。
結果，呢個「萬千熄機賀台慶」行動下，無綫台慶仲有29點收視，話高唔高，但都算頂住咗對手的攻勢。無綫為此要捐300萬俾慈善機構做宣傳，就算係贏咗呢場仗，都只能算係慘勝而已。
無綫而家局面，最大敵人不是增發免費牌，而係媒體不斷增多，若說新媒體衝擊傳媒，電視其實係首當衝，因為年輕一代基本上唔會坐定定睇電視，無綫而家賺錢係近年高峰，但觀眾人數持續流失，出現收入與觀眾不相稱現象，可能亦係因為呢個原因，先惹到有其他媒體出來砌佢，叫人熄機，呢個至係TVB股價最大的隱憂。
陸羽仁
金融High Tea 舊文
