做細容易做大難
2013年11月04日
港股一過期指結算後表現硬淨，睇嚟淡友已自動在上月結算時平倉，中共即將召開第18屆三中全會講改革，淡友暫時收工，怕個市突然向上俾人夾死，不過在北京開會有結果前，大市還是以上落為主。習主席上周六話18屆三中全會將提出綜合改革方案，就全面深化改革進行總體部署。外界要睇三中全會提出來的改革措施有無力、受唔受外資歡迎。
早兩日同基金經理食飯，講起大市雖然旺番少少，但宏觀計仍然只是大型上落市，今年個市大約在19500點至24000點中間走動，未走出大方向，買股搵食唔係咁易，芬佬近年尾都開始審慎，唔想「臨尾香」。
講講吓講到皇牌基金管理公司惠理集團(806) ，佢隻股今年都無大表現，年初仲有5元，家得番4.65元，跑輸大市。不過大家要分清楚，上市的是基金管理公司，唔係惠理的基金，但係基金管理公司股價唔好，多多少少反映佢嗰行唔易做。
皇牌基金未贏盈富
睇吓惠理旗下皇牌基金「惠理價值基金」的表現，就對惠理集團的股價走向可思過半。惠理價值基金可供認購的C單位一個月升了6.1%，但年初至今只係升咗5.2%，即係在10月之前，還要輸錢，靠10月表現追番。若不由年初計，52周累積計表現升13.5%，但3年累計仲要輸3%。C單位在2009年10月15日成立，成立至今亦只是升了28.2%，玩咗4年無大進帳。
睇基金表現唔係睇絕對表現，係睇佢相對大市的表現，惠理價值基金年初至今升5.2%，買反映恒指走勢的盈富基金(2800) ，今年至今升咗2.4%，仲有2.8厘息收，兩者加埋回報咁啱又係5.2%，惠理價值基金只是與盈富基金同步。咁就出現一個問題，點解投資者要畀咁高管理費、表現費去買這些自主性基金？
惠理價值基金C單位一年收管理費1.25%，另外仲要好似對沖基金咁收表現費，表現費是基金盈利的15%(以新高價計)；盈富基金只收0.15%，當然唔使收表現費。指數基金追蹤指數，基金經理唔使用腦；自主型基金的管理人要用腦揀股，所以管理費收多8倍、10倍。個別管理得好好的基金，仲要收表現費，前提係基金表現爆晒燈，客戶分10%、20%畀芬佬都好合理。但理念歸理念，若基金表現由天堂跌入凡間後，客戶先係唔順畀咁多錢，再差啲就走人，所以做芬佬壓力都唔細。
上落市基金搵食難
英雄通常有往績，惠理價值基金的往績當然好勁，佢最早成立的A單位在1993年開檔，成立至今升咗2134%，升21倍，當年買10萬，家有220萬。但你見佢得近年追入惠理價值基金C單位，就無咁好景啦。管理基金的惠理集團在2007年11月上市，好多人話見到投資銀行、基金管理公司上市，大市好可能見頂，真係無錯，惠理係咁，高盛係咁，商品大行嘉能可(805) 上市都係咁，惠理睇到大市高峰上市，隨後恒指大跌，到2009年大反彈，之後展開一個大型上落市，恒指在18000點至25000點間走動，基金搵食難，惠理的基金也不例外。
惠理集團作為基金管理公司，若旗下基金表現好，佢分15%表現費都好和味。以惠理價值基金為例，佢有13.9億美元資產(約107.6億港元)，若遇着好年頭升20%，惠理分15%盈利，即係一隻基金都可以分到3.2億！但好似家咁，以惠理價值基金為例，3年累計仲要輸3%，即係無創新高價，收唔到盈利15%的表現費，即使今年升5.2%，未追番之前輸的，1毫子都分唔到，只係收1.5%管理費，就似吊鹽水。睇埋惠理其他基金的表現，都唔好得過惠理價值基金好多。
我就問同台食飯的芬佬，惠理當年咁勁，點解現在無法重拾當日年年升20、30%的輝煌日子，佢講咗幾個原因。第一，惠理講價值投資，90年代都無人睇啲無莊家炒的細股，惠理老闆謝清海的團隊，當年真係在沙裹淘金，搵到唔少生意做得好好但無人理的股仔。但如今做這種價值投資的基金好多，人人去搵，買得落手的筍貨日少。
第二是惠理當年體積細，揀中三兩隻好股就掂，如今搞到咁大，即使買中三幾雙細股都無用，大基金只能食大嘢，坐住大浪上。第三，惠理到2000年後，仲食到一啲大浪，包括睇中內地B股早晚要開放或轉換，所以大手吸入B股，後來一講話AB股長線要合併，B股大幅炒上，佢就食到一個浪。另外，2003年沙士低潮時，惠理亦大手買貨，又食一浸。但最近呢兩三年已經無這些歌仔可唱。
回落買股跑贏基金
芬佬話，體積過百億的基金，好多細股買嚟都無用，只能買大股，而且又唔可以買得太集中，怕一隻衰咗搞死自己，所以有好多掣肘，若大市有5%、6%回報，基金扣埋管理費要有8%、10%回報，跑贏大市，已經唔易。問題係有些基金往績輝煌，客戶期望太高，想年年有20%回報，點樣可以做到？
我插句口話，從呢個角度睇，散戶好過芬佬，散戶買貨少進出容易，又唔一定要買得好散，睇中一隻坐一段；又或者睇住大市回落時吸納，走一個小浪回升，都有10%。仲有一樣，散戶只要係買有質素的大股，衰咗可以坐，好多時坐一年半載可坐番來，見番家鄉先至沽，加埋收息又有正回報。但基金唔可以等，日日都睇到表現，年底又要結數，成年都唔得，客戶都走咗囉，所以唔可以靠坐貨捱過低潮，局限多多。
舉個例，散戶早前見昆侖能源(135) 大跌，都唔好話在最低價10.72元買，就當你在第一次回落時在11.2元買咗，上周五收市報12.4元，已經有10.7%回報，若膽小者可以收工走人，呢種係基金追求1年的回報目標，散戶唾手可得。若你咁準在昆侖低位10.72時買，上周五高位12.78元沽，更有19%回報。(題外話講兩句昆侖走勢，佢慢慢造出一級級上的走勢，若有平貨在手，可候回到12元時加注，唔使太急走。)
買建行博收高息
結論係散戶要發大達唔易，但若想跑贏芬佬唔難，期望一年有10%回報唔係太超現實。好似現在國企指數暫時都係炒上落，等佢回低少少，可以吸納，例如恒生H股指數ETF(2828) ，等佢回到105元買吓，明年初都有機會上番120元。
食到一個浪又跑贏芬佬，萬一睇錯揸住佢一年都收番2.5厘息，可以幫補吓。大膽少少買內銀如建行(939) ，佢第三季純利增長9.4%，業績平平，但壞帳唔多，質素搭夠，若估內地利率市場化，建行都唔會好快死，買佢更可以收5.6厘息。
回頭講番惠理集團，剛睇到瑞信對佢的評價，第一次畀惠理「中性」評級，目標價看5元(現價4.65元)，相當於2014年預測市盈率19倍，有8%上望空間。佢話惠理基金的管理模式獨特，僅得數個上市同業在亞洲地區具相近知名度。公司股份現價市盈率18倍，較全球同業的平均16.5倍為高。瑞信認為惠理集中發展大中華地區，未來催化劑包括市場動向、基金淨流向、投資表現等。另外，摩根大通由去年初到今年初一路睇好惠理，話目標價6元，評級買入，但今年將盡，摩通都有少少跌眼鏡啦。
惠理去年純利3.8億元，大升125%，但到今年中期純利只得330萬元，較去年同期的8820萬元大跌96.3%。佢中期業績大跌，同投資在自己基金損失1億元有關，預計下半年基金表現回升，全年業績會改善。但睇佢最大幾隻基金表現都係一般，唔會收到好多表現費，所以估計下半年會好啲，但追唔追得番去年業績都有啲疑問。現價等如瑞信預測惠理2014年盈利的市盈率17.7倍，一啲都唔便宜。
呢個故事話畀我地聽，在投資的世界，只要你對年回報要求唔係好高，做細容易做大難喎。
陸羽仁
金融High Tea 舊文
