尋寶咪心急
2013年11月07日
新股市場近日好熱鬧，但散戶要搵食唔係咁易，昨日兩隻新股掛牌，結果一升一跌，從事展覽會業務的Mega Expo(1360) 早段曾炒高至1.56元，較招股價1.33元高出17%，其後反覆回落，並以近全日低位收市，收報1.42元，仍較招股價1.33元高7%，散戶每手不計手續費賺180元，計落有小小肉食。
另一隻重慶銀行(1963) 開市報6元，與招股價持平，全日大部份時間「潛水」，尾市一度重上招股價，惟收市仍微跌，收報5.99元，每手500股，不計手續費蝕5元。假如散戶兩隻股都有申請，咁就斬埋唔夠一餐。
新股唔易攞利是
近日新股陸續有來，市場消息指下周掛牌的徽商銀行(3698) 以接近招股價下限3.53元定價。比較特別係徽商銀行除引入周大福等6名基礎投資者外，在招股初期曾經有報道話國際著名投資者索羅斯旗下基金有意認購，現時報道又話索羅斯最終全數抽飛，咁搞法唔知先前發出消息者算唔算揸流攤呢？假如散戶諗住跟大鱷搵食，現在就唔知點算。徽銀今次唔攞盡個價，希望掛牌當日隻股爭爭氣氣頂住。
抽新股遊戲最好玩係國企上市潮時代，當時好多大型國企要掛牌，中央思維係把大型國企推上市，借市場力量提升國企股管理，故此股價唔係咁計較，新股訂價都留有水位，當時買親國企股都係贏多輸少，?家國企股上得八八九九，改由民企上陣，民企賣股係入自己荷包，當然訂價無咁手鬆，加上市況無咁好，所以遊戲就難玩好多，所以以前抽新股係攞利是，而家抽新股就真係要考眼光，若然要重手小小或者借「孖展」，就要自己諗過覺得有投資價值先好出手。
港股昨日繼續係兩萬三千點玩拉鋸，上上落落一輪後，恒生指數收報23036，跌2點；國企指數受內地股市偏軟影響跌多啲，收報10561，跌75點，成交金額515億元。
三中全會將於周六召開，會議前夕，國家領導人密集出外考察，並且發表講話。投資者希望可以從中得到「尋寶」啟示。
器材股炒領導人巡廠
國家主席習近平近日到湖南考察時強調，加快轉變經濟發展方式，重點在於優化產業結構、消化過剩產能。他提醒各級不要把發展簡單化為增加生產總值，一味以生產總值排名比高低、論英雄。即係話，阿爺現在追求的係合理的經濟增長，產業將會繼續整合。在這種情況下，最受惠的自然係龍頭企業，中短線而言，投資者最好都係「買大唔買細」。
至於揀乜股？習近平特意考察生產智能電表等能源計量產品的威勝(3393) ，相信智慧電網、資訊科技器材等相關行業係中央睇好的重點行業。該板塊內唔少股票已經聞風起舞，炒到七彩，其中美麗中國控股(706) 及中天國際(2379) 升超過6%；冠捷科技(903) 、百靈達國際(2326) 炒高10%，融達控股(948) 抽高逾20%！威勝升幅反而一般，只係微升約1%。不過，好多分析都話三中全會不會大手大腳搞放水或投資，而係着重結構調整，即係未來的遊戲規則有人得就有人失，不會個個係贏家，故此炒政策股不能一擁而上，因為買得貴咗，好可能俾人震一震就震咗出街，變成偷雞唔到蝕渣米，若然見到股價急升，最好都係等一等機會先去撈貨。
陸羽仁
金融High Tea 舊文
