底弱難撈
2013/12/2 上午 09:39:58
網誌分類: 經濟
周末期間內地官方公布的11月份製造業採購經理指數(PMI)錄得51.4，略勝市場預期，反映內地經濟仍有增長動力，不是一升就榭。
但利淡消息也有，中國證監會周六發布文件，估計需要1個月時間完成重啟新股市場的工作，預計到明年1月，大約有50家企業將會陸續上市，中證監強調，在重開新股市場之前，將會加強審核及監管。
雖知內地長期停止新股上市，有800間公司排哂隊，皆因中央見個市咁弱，怕一開始上市個市就急插。阿爺見咁多公司排隊等上市，唔係幾好睇，7、8月時叫協助上市的投行自斬三刀，再新審核唔夠格上市的公司叫佢地唔好再申請，藉此減少排隊新股的數量，可見內地對上市機會如何供不應求。阿爺搞完十八屆三中全會後，開始對個市有信心，才夠膽重開IPO。
不過今次A股市場重啟新股集資，多少會對內地股市有啲陰影，要看市場如何消化這消息，以及睇睇一兩個月新股上市後有無炒熱。
另外想講講隻銀基(886)
，佢代理五糧液等烈酒，內地反官員浪費政策嚴重打擊高檔白酒業，銀基早前已發盈警，最新公布截至今年9月底止中期虧損進一步擴大，由去年同期的1.77億元，大幅擴大至7.72億元，每股基本虧損0.5694元。以上周五收1.12元計，等如每股虧損近股價的一半，雖說早前發盈警已反映了部份負面因素，但咁樣大蝕近8億，都咪話唔恐怖。 銀基於中期營業額大跌51.6%至1.14億元，銷售成本卻增加26%至1.92億元，在毛利層面已按年由盈轉蝕，虧損7815萬元，即係話未計公司成本燈油火爉，賣一枝酒蝕一枝。此外，減值虧損擴大至4.92億元，拖累業績。
經營轉差，令銀基的資產負債表亦相當難睇。截至9月30日，銀基存貨仍然高企，達11.24億元，按年回落約8.4%；應收貿易款項由去年同期的4.26億元，驟縮至447萬元，皆因減值撥備爆增80.61%至9.8億元；現金及現金等值則大幅縮減，按年大跌81.04%至6019萬元。資產淨值由12.34億跌至5.2億元。
銀基在中期報告中稱，內地高端白酒業今年以來持續低迷，是令業績轉差的主因。政府頒布的節約規定等，使得經銷商備貨趨向謹慎，令市場對高端白酒的需求進一步下降。期內，銀基已開始轉變策略，積極開發中低端白酒，惟其正處於推行階段，對銷售貢獻並不明顯。
有「女股神」之稱的西京投資主席劉央，去年10月大手接鄭裕彤持股後曾豪言看好銀基，還會不停地增持。不過，根據港交所披露顯示，劉央於10月底已減持銀基4000萬股，至持有約1.5億股，持股量跌至11.07%。「女股神」今次呢1.5億股仍然挾實，好難鬱。
散戶見股份大跌鐘意低撈，但呢隻嘢我叫大家咪制，唔係話佢一定唔得，係風險好高。銀基持續經營已出現問題，因為生意太少成本太大，一做即虧，理論上要市場好轉售價回升、或者成功開發到中低端市場，才可扭轉劣勢。問題是習主席反浪費未似停手，官員唔敢公然飲酒，怕被人舉報，高端市場無咁快回復，開中低端市場又唔係咁快可以成功，家家做高端酒都想轉去中低端市場，競爭必然厲害。銀基佢手上只得6019萬元現金，頂得幾耐? 佢仲有11.24億存貨，賣唔去仲有幾多減值空間，又要找數，現金週轉隨時出問題，真係要大集資才有水去頂。
凡係跌得多的東西都會彈，有人揸重貨說不定會幫手頂一頂。問題係要睇間公司基本因素有無好轉，才知道係見咗底、反彈後會再上，定未見底、有爆煲風險，銀基似係後者，即使睇住佢彈都唔好信哂，呢啲錢好難賺。
最後講兩句美股，美股周五提早三個小時收市，走勢與前幾日差唔多，都係破頂後回順，一級一級咁上。但唔經唔覺，一個月埋單計數就非常和味，11月杜指及納指勁漲超過3.5%，標普500指數亦大升2.8%。隨住美股不斷創新高，起泡之說，不絕於耳，股神巴菲特話美股仍有上升空間，不過股票已好貴，無乜選擇。
陸羽仁
回應(9) 我想回應
陸羽仁 BLOG 舊文
