撈一注
2013年12月12日
要跌的始終要跌，借住美國有可能提前退市，加上內地股市下挫，令港股出現一次像樣的調整。
呢輪調整主要係受提前退市消息影響。早前，同中環茶友傾起，話最近新盤好賣，地產股照弱，相信係市場擔心發展商劈價賣樓，預見美國會好快收水。呢類落後股有「路邊雞」的預測作用，若然呢類股見底，個市應該差唔多。昨日喺大市急跌下，對息口敏感的地產股全面向下，好多都跌破心理關口。相反，最近表現硬淨的內險股，昨日紛紛回落，反映最強板塊可以出現沽貨，調整趨向全面。
預咗捱價再出擊
地產股成個板塊下挫之餘，值得留意係藍籌地產股主要係跟隨向下，個別跌幅仲細過大市，反映沽壓開始減少。
茶友話，外界對聯儲局的預期，一來係捉心理，估計主席伯南克喺離任前想好頭好尾，象徵式都叫做啟動咗退市；二來喺美國債息係強勁數據下，仍然能夠企穩無飆升，部份主張退市的官員認為市場已接受了消息，應該係時間郁手。以香港地產股表現嚟睇，市場同樣反映有退市威脅，所以地產股才會持續跑贏大市，而家消息浮晒面，可能熬多幾日，等到月尾先醞釀反彈。
陸羽仁預告話要耐心等調整，然後入貨博年尾前後食一轉胡，茶友問現時郁得手未？假如你係輕身負磅少，手頭有子彈的話，應該可以落第一注，之後預咗個市再跌啲，再落第二注，撈底走短線無可能買到最平，做好捱價準備拉勻落注就可以考慮伺機出擊。
對象方面，大家各有心水，茶友想食「路邊雞」，吼吓本港地產股，陸羽仁就傾向買內房股。內房近日都係「弱煲」一族，主要係受內地加強調控同收水陰影籠罩。由於內房都跌得幾平，好多股份已經破位，個股方面，穩陣派可以諗龍頭股中國海外(688) ，睇圖佢係大型上落格局，風險低啲，同時彈力當然無其他跌得多的同類股咁好。如果鍾意博一博，可以考慮雅居樂(3383) 、碧桂園(2007) 以至越秀地產(123) 呢類超跌股。
借住投資者擔心內地增長引擎，明年增長目標或調低至7%，加上聯儲局下周會議有可能提及退市夾擊，恒生指數收市大跌逾405點，收報23338，國企指數跌得更慘，收報11073，瀉308點，國指成份股更全軍覆沒，成交增至逾700億元。
內銀股再中一槌
喺跌市下，內地傳媒報道，包括工行(1398) 、建行(939) 、農行(1288) 、中行(3988) 及國開行今日將發行首批總規模達190億元人民幣的同業存款證，分析估計下一步可能會將存款證市場擴大至企業和個人。
利率一旦市場化，以前受中央保護的國有銀行自然首當其衝。內銀股昨日全線向下，成為拖累大市向下的元兇，四大國有銀行全部跌超過2%。
另一股拖累大市的力量係中資電訊股。中移動(941) 在年中時首先推出全國性的「手機錢包」業務。聯通(762) 及中電信(728) 相繼於9月及11月推出類似業務。唔知係唔係壟斷味道太濃，引起了各界的關注。人行支付結算司副司長樊爽文就質疑，「移動支付行業任何參與者想大包大攬地把這個行業通吃，都是不可能也是不現實的，」透露正在草擬手機支付指導意見，以引導及規範有關發展。此語一出，三大電訊股即時腳軟，中移動大跌超過3%至81.4元，總之一句到尾，就係跌市無好股啦。
陸羽仁
金融High Tea 舊文
