中環在線：純官突做恒生獨董 - 李華華
■鄭家純無端端應承幫恒生做獨立非執董。
鄭家純(純官)做緊新世界發展(017)、周大福(1929)等7間上市公司主席，本身已經好唔得閒，甚少幫其他上市公司做獨董，近日竟然無端端應承幫恒生銀行(011)做獨立非執董，即日生效。
除新世界系與家族有份投資嘅公司，純官只係做緊香港興業(480)獨董，而且係由1989年開始做，今次加入恒生都算畀面，如果明年恒生開股東會獲股東通過，任期至2018年。
恒生非執董陣容都有唔少地產界猛人，包括瑞安(983)主席羅康瑞、本月中加入嘅希慎(014)主席利蘊蓮。其實，另一間本地銀行東亞(023)同樣有一班大孖沙坐鎮，好似新地(016)老闆郭炳江同純官妹夫杜惠愷。
不過，咁多位嘅董事會出席率都麻麻哋，羅康瑞舊年6次會議中，只係到咗4次，郭炳江同杜惠愷就4次會只到咗3次。
上一則: 潘廸生愛用「DP」超人都有「LKS」富豪車牌愛曬名 - 李華華
下一則: 中環在線：馬時亨自爆俾阿松鬧 - 李華華
中環在線 - 李華華 舊文
