金手指：四班車都上唔到 - 孫柏文
■筆者向港鐵啲人反映擠迫及上不到車，但會有效用嗎？資料圖片
上周，孫柏文有幸同港鐵(066)啲人食飯交流意見。我未試過用「有幸」去形容同上市公司飯局，今次要，係因為我入傳媒八年，卒之等到同港鐵交流啦！乜單位、人都試過坐低，真心傾去交換意見，梁振英都兩次。得兩個未試過，港鐵係其中一個。點解？因見人聽意見唔係港鐵嘅企業文化囉！其他在場嘅人都話佢哋DNA好arrogant，但都係話「啲人唔妥你加價」。Oh please。我同佢哋話：「由迫爆車、水貨客、月台屎等，你哋係中港矛盾嘅中心，中港矛盾就係香港第一贏曬嘅政治力量，肯定唔係加價。是日網上廣傳一張你哋發嘅車廂內飲食告票，係咪厚多士後嚴打呀？」
港鐵係中港矛盾中心
要員答：「係。」我話：「恭喜曬！炸彈已埋。啲人會先開心話卒之執法，不過呢場嚴打拉好多港人後問，究竟分別發咗幾多張告票畀香港人同大陸人呀？而最重要係究竟兩群人當中，交罰款百分比？以你哋文化，一定唔答㗎啦！係咪？跟住啲網友砌，又係得香港人畀錢，大陸人逃之夭夭啦！又加深中港矛盾！」
最弊係席上啲人鬧乜，佢哋都好似有答案。迫車？低頭族。加班呢？換緊信號系統，要八年。加幾多班？百分之十。仲要話而家99.99%準時。到呢到我頂唔順再駁話：「你班班車準時開對一個等四班車都上唔到嘅人有咩用呀？我哋香港人深信競爭先有進步。你哋鐵路優先殺巴士線、小巴，做最大地產發展商等，呢啲通通都可以忍，只要你哋交到貨就得，而家交到咩？民意上鐵路優先已岌岌可危。」股價必定受挫。我嘅建議？港鐵如果真心想香港人每日由A去B快啲，就去搵例如載通(062)、進智公交(077)等，劃個香港交通大改革plan啦，一億自由神來緊呀！不過今次肯見我，雖反映desperation水平，其實真係有大進步，好過唔見。而我入行八年未傾過計嘅單位除港鐵外仲有邊個？就係唐英年。
孫柏文
獨立股評人
http://facebook.com/shuen
本欄逢周二刊出
上一則: 青心直說：追星廣告真定假 - 胡孟青
下一則: 一周三件：中國玻璃極抵買 - 錢雋
金手指 - 孫柏文 舊文
