老外老細３
2014/6/23 上午 10:13:56
網誌分類: 經濟
美股又創新高，標普500指數六連漲，與杜指齊創盤中歷史新高。標普一早創咗高位啦，只差杜指都在上周五上埋高位，杜指收市漲26點至16948點，標普500指數升3點，收報1963點；納指漲9點，造4368點。過去一周，杜指漲1%，標普500指數最勁，升1.4%，納指升1.3%。
市場氣氛熱熾，與聯儲局的貨幣政策有直接關係。尤其係美國經濟復甦步伐強勁。上週五美國勞工部公佈，5月美國36個州就業人數增加，20個州的失業率下降，顯示全國範圍勞動力市場持續走強。其中北達科他州失業率已經跌至2.6%。在QE年代，美國經濟數據好，投資者都驚聯儲局收水而好消息當壞消息炒。可能係聯儲局有前車之鑑，已經識得如何去管理市場期望，事實上又真係做得非常成功，市場開始唔怕收水，經濟好消息就當好消息炒。
美國經濟狀況明顯好轉，聯儲局主席耶倫在上周的議息會議後卻暗示，在一段長時間內，美國都會保持低利率，表現出的態度，比市場預期的更加鴿派，雖然佢呢啲取態好可能只是一種姿態，但市場好受。現時，除了中東局勢比較緊張，推高紐約原油至每桶107美元上方(最新報107.12美元)，金價升番上去每安士1300美元樓上之外(最新報1314美元)，世界其他地方沒有大事發生，而美國總統奧巴馬對空襲伊拉克遜尼派武裝分子，日前卻下令向派300名特種部隊士兵去伊拉克。美國立即空襲伊拉克的可能性又細番。軍事衝突規模縮細咗，投資者鬆口氣，世界波照睇，股票繼續炒。再睇埋「股市恐懼」指標VIX指數持續維持有2007年以來的低水準，顯示投資者信心爆炸。
事實上，據美銀美林全球研究部上週五的報告稱，至上週三(18日)的一周內，全球債券基金流出資金23億美元，為連續第十五周凈流出。同期的全球股票基金則錄得126億美元的資金流入，創了2月以來新高。其中以美國股票為主的基金就流入了84億美元。水漲船高，亦解釋了美股近期有漲無回的原因。
我係支持相反理論人士，見美股「股市恐懼」指標VIX指數低到咁，又覺得應該審慎啲啦。
再講辦公室風雲下下集。上期講到「黄皮白心」老細David玩走完我朋友，升咗阿John上去做聯席董事，唔夠兩個月，就媽走咗阿John，件事戲劇性到無人有，睇到大家都呆咗。
網友淑敏睇完上一篇的結論是:「原來係大大公司做高層員工, 是不需要去做實幹的, 只要吹水得, 下屬又有單返, 就可以 un un 腳日日等放工............我都想我公司可以成為上市大公司......咁我都應該可以日日un un 腳等放工啦 ! 唔使現在日日做到死下死下。」
淑敏，我恐怕你作錯結論，件事唔係咁。我講得咁詳細，大家都應該知道係我朋友報料俾我啦，到佢老細炒咗阿John後，我同呢個朋友落老蘭飲嘢，叫做開解吓佢啦。因為佢在位時阿John好捧佢場，但佢一走阿John上咗位後連佢電話都唔再接，飛咗線俾秘書答佢「唔得閒」(個秘書朋友都識你話佢幾無癮)。所以朋友直指阿John係二五仔。後來二五仔咁快玩完，朋友都可以飲番杯啦。
但一杯過後，朋友度氣一過，就話其實佢好同情阿John，阿John死法同佢一樣，都係誤會咗個老闆係friend，結果兩嘢就玩完咗。兩個人一樣咁慘。
呢個朋友都係叻人，佢那一刻已反省到大家都誤會咗老細David的為人，佢地初時見老細咁friend，就以為同佢好熟，大家拍吓膞頭吹吓水就得，或者做咗嘢都唔使話佢知，以為佢係鬼佬無所謂，只想玩唔想知呢啲實際嘢。其實老細David表面隨和，實際工心計，我朋友就係誤會咗老細David係那種「只要吹水得, 下屬又有單返, 就可以 un un 腳日日等放工」的人，其實佢唔係，佢係「又要威、又要食雞」的人。
朋友好快總結到，老細David只係玩吓手段，扶人上位，要你交數，仲要係榮耀全歸上主那一種。其實那時銀行黃金時代已過，進入高壓交數時代，美國總公司個CFO個個月問數，David壓力極大。David要食雞，要夥記有功課交俾佢，亦要威，交功課的功勞全歸佢，我朋友死在搶咗老細啲威，阿John死在交唔到數俾老細。所以David逼阿John走時，鬧佢鬧到全世界都知，係想大家明白佢係睇業績的，不是只講friend friend。
故事發展落去，David升咗阿Jack上去揸旗。阿Jack城大畢業，雖然係校內班內最叻的一兩個，才入到外資銀行，但自知唔係中外名牌大學生，唯有靠業績補數，所以樣樣事做到加零七，交到足。最好笑係老David升咗佢後，故技重施，又日日叫佢去老蘭兼食飯，放假又約埋一家大細去打波，阿Jack本來已經唔鐘意玩呢啲，仲見到上兩件都係玩玩吓以為同老細好friend就死咗，食飯飲嘢全部背脊骨落。佢同我朋友講(佢地係真friend)，有一次同老細David在老蘭坐咗三粒鐘，又未夠鐘食飯，講到無嘢好講，就將自己由細到大溝女的經歷講曬俾老細聽。連呢啲嘢都要出賣埋，阿Jack真係覺得天何太狠也。
不過就係阿Jack呢種在公在私都交足功課的心態，老細David好滿意，係咁指阿 Jack做嘢，就交出成績，而且阿Jack在鬼佬老細前從不居功，總部CEO、CFO來港佢唔係爭取出現，係爭取不出現，搞到David要逼佢出席，而阿Jack在老細面前好少講嘢，好似宅男一樣，咁David就好like佢囉。
另一方面，我朋友仲有個趣位，離職半年後，佢去咗另一間外資銀行打工，到生日竟然收到一枝Château Lafite Rothschild，係佢夢想之紅酒，你估邊個送俾佢，竟然係Ex老細David呀，你話搞唔搞鬼呢?
陸羽仁
回應(3) 我想回應
陸羽仁 BLOG 舊文
