Prof J財技特訓班：券商等釣金龜
■筆者形容指，港券商突然得寵，被內地券商頻頻示愛。資料圖片
無幾耐前，當宣佈香港上海今年可以同步連線炒股時，市場反應係興奮咗，一陣之後就回歸平靜，當時好多人話乜鬼A、H股折讓，買內地買唔到嘅股、李超人股等等！
Prof J已經同你講，最發嘅係香港券商股，因為佢哋係今次內地券商嘅甜心，呢班內地盛男券商點可以唔整番件似樣嘅港女券商「共訂姻緣」呢！
類似的例子多不勝數，卓亞資本(8295)俾內地資產管理公司入股，南華(619)同景福(280)又話有洽售啦！連帶葉老闆嘅旗艦店敦沛金融(812)，亦被西南証券期下嘅子公司透過增資而食咗落肚！
內地同業吼實機會
見到咁嘅情況，未到10月10日，本港嘅券商股隨時會有內地券商睇中，仲唔扮靚靚等你咩！
我亦都好明白內地嘅企業點樣諗法，有錢不問價追入，最緊係要快，加上佢哋覺得有咗上市公司的平台，又係可以快好多去集資同搵水，跟住係放數轉而向投行業務出發，咁樣咪更加有聲勢，有智慧！
有齊證監牌照嘅企業確係掂，保險經紀牌照都係一樣，因為有曬啲SFC1、2、4、6、9，再加多個財富管理牌，就真係冇得頂嘞，買呢種齊牌公司確係相對快手！
Prof J收到風，有內地老闆肯畀人仔2.6球，買個保險牌，有牌有價，亦都係阿爺送畀香港券商(上咗市)嘅禮物！其他嘅C組券商，喺環境改造下，更加難搵食！
做國企劵商係呢幾年發展嘅大方向，因為有高度嘅自主權(老闆畀嘅話)，最重要就係可以交換價值(exchange of value)，令到大家可以各展所長！
家陣可以買嘅券商股，所剩無幾，會唔會好似「求愛大作戰」一樣，令到大家不顧一切，搶盡香港券商股呢？放長雙眼一齊睇落去。
徐燦傑
中國銀河國際財富管理主管
本欄逢周四刊出
識睇一定睇蘋果嘅足動世盃：
http://worldcup2014.appledaily.com/
徐燦傑
Prof J財技特訓班 - 徐燦傑 舊文
