異動空間：靄華破頂可再爆
港股震盪式向上，個股走勢兩極化，每個板塊只炒一兩隻，其他一係點穴，一係急插，京信通信(2342)、金風科技(2208)兩日飆三成，半新股彩生活(1778)掛牌兩個月飆1倍，畏高唔敢追貨，只能繼續捱窮，諗住追落後，點知越追回報越落後。當行業某隻股份率先破頂，代表這就是領袖股，只能跟紅頂白，愛拚才會贏！
近年唔少財仔上市，如香港信貸(1273)、第一信用(8215)及靄華押業(1319)，前兩者低位爭紮，靄華昨急漲13%創上市新高，市值8.1億元，為三者之冠。大家都係二叔公，做抵押貸款，何解表現差咁遠？魏力相信轉攻樓按是靄華爆升的催化劑。典當、私人貸款增長空間有限，但政府收緊樓按成數，加上樓價攀升，上車客在銀行做唔足按揭，唔少唯有搵財仔幫忙。截至2月底止年度，公司新造按揭飆升2.6倍至4.3億元，今年勢維持高增長。
自5月底以來，大股東共增持逾700萬股，每股介乎1.4至1.6元，真金白銀掟逾千萬掃貨，睇好前景毋庸置疑。橫行收集近半年，貨源收乾收淨，大股東?近七成，爆上無難度，短線先睇2.2元，跌穿1.58元止蝕。
魏力
http://www.facebook.com/2012jason
魏力
異動空間 - 魏力 舊文
