化戰略為盈利
2014年08月26日
外圍軟軟哋，港股本來諗住要調一調，但低開之後午市又上番，就算內地第三批IPO本周開始申請認購，內地股市反覆向下，上證指數跌0.5%；深成指數跌1.5%，港股仍然撐住，恒生指數全日收報25166點，升54點；國企指數收報11115點，升57點，成交略為縮減。睇嚟大戶似乎想頂吓，等候期指結算。
舊經濟股近日炒炒吓，上個星期中石化(386) 宣佈業績倒退，但大行話佢無預期咁衰喎，於是股價又炒上，要留意係「三桶油」昨日全線炒上。本來，呢三間公司分別集中喺上下游業務，大家分工不同，好少會一齊炒上，但今年下半年起，三桶油表現開始好轉，好似中石油(857) 同中石化齊齊創咗新高，相對中海油(883) 就有啲落後。
中石油同中石化股價呈強，同佢哋業績無直接關係，主要係投資者憧憬佢哋會有重組同賣產，當中包括中石油出售油管業務同中石化標售油站業務。
由於傳標售油站開始揀咗幾個潛在買家，中石化昨日升得幾急，收市報8.04元，升逾4%，家跟進變咗有啲難度。中線嚟睇，估計喺好消息證實前，股價仲有機會「加油」。
潔淨能源係今年炒作板塊之一，呢類新產業股份特色係表現唔穩定，好似近半年升咗好多嘅比亞迪(1211) 中績差過預期，仲出埋盈警，但因為新能源車銷售平穩，大摩就力撐，公司董事長兼總裁王傳福亦強調，相信下半年可受惠新車款的推出，包括高端SUV型S7，提升銷售。
報告指出，比亞迪上半年純利倒退15.5%至3.61億元人民幣，是該股盈利3.5至4.9億元預測下限，該行料下半年餘下今年時間銷售仍曳。
大摩家將比亞迪旗下車款「秦」，認為自五月單月銷售逾千部，比亞迪也佔內地新能源車上半年逾37%銷售，加上五月配股集資42億元用作擴展電池廠，相信有助2015年後的銷售，維持「中性」評級。比亞迪朝早開市一度大跌8.7%後急彈，收市仲倒升2.2%，收報50.3元。
內地現時一個特別經濟因素，就係反貪腐全面鋪開，有時會影響企業，特別係國企嘅活動，新能源企業都避唔開呢個因素。好似專做能源設備的坦泰(2188) ，公佈今年六月底止營業額約人民幣5880萬元，較去年同期減少約7.65%，期內虧損為約899萬元，較去年同期增加約164萬元。
生意下滑的主要原因為電力直流產品的招標數量減少，同時電動汽車充電設備部份合同未能發貨無法變成期內的收入。
泰坦下半年收入料改善
泰坦主力經營傳統直流電業務，電網監測裝置，同埋較熱門的電動車充電裝備。傳統直流電業務暫時仲係主力收益來源，有熟悉公司情況人士指出，上半年電網委託的直流電裝置生意減少，一大原因係中央審計影響，電網都唔敢批生意出街，預料下半年有機會恢復。
另一方面，集團的電動車充電裝置，正面對國家電網退出城市充電站建設的宏觀市場變化，有分析認為國家電網退出，反而有利其他企業進場。泰坦喺炒潔淨能源的概念下，今年去過1.46元高位，業績公佈前回落，公佈麻麻哋嘅業績後反而企穩，昨日收報1.12元，倒升1.8%。
泰坦在相關領域為先行者，有形容佢哋戰略上贏咗，跟住睇佢能唔能夠將有利形勢轉化成盈利嘞。電動車概念股未炒完，候低吸納，定好止蝕，都有一定值博率。
陸羽仁
金融High Tea 舊文
