狼來了
2014年08月22日
聯儲局公佈上月會議記錄，委員普遍認為就業市場改善情況比預期好，提早加息是恰當的做法。不過，大部份委員表示，要視乎更多經濟數據，特別是勞動市場，才能決定應否提早加息。儲局咁講擺明係出口術，符合咗陸羽仁話美息可能比預計早上調嘅估計。
儲局為提早加息鋪路
距離10月結束買債時間愈近，何時加息的爭議也逐步升溫。美國近月發表的數據，大致顯示經濟回暖，從儲局立場，如果頂得順的話，加到息等如儲番啲子彈，應付可能出現的突發事件或經濟放緩，所以點樣喺唔影響復甦下令息率由極低水平回復正常，相信係所有理事共識，關鍵只係有人進取啲，要求加得快啲；有人就穩陣啲，所以如果經濟勢頭不變，息口向上已係預期之內，儲局依家放出唔同意見的氣球，就係為加息玩吓狼來了嘅口技，息口變化相信會係未來美股一個炒作因素。
從過去經驗，加息初期股市係唔會大跌嘅，通常係傳出加息跌一跌，消化一輪又炒上，到真係加息又跌一跌，跟住又炒上，直至加到咁上下，企業開始頂唔順，經濟有滑落跡象，咁牛市就宣告死亡嘞。
聯儲局記錄令加息預期升溫，加上匯豐中國製造業採購經理人指數(PMI)初值差過市場預期，人行亦再度出手正回購收水100億元人民幣，中港股市昨日應聲下跌。恒指一度挫達263點，低見24896點，雖然午後跌幅略收斂，但未能收復25000，恒指全日收報24994點，跌165點；國企指數收報10942點，跌113點。
媒體難做 無綫多做少賺
香港中旅(308) 宣佈派特別中期股息每股2.5仙，董事總經理許慕韓透露，中旅有意將現時名下香港物業改建成為酒店或服務式住宅；他指，珠海二期建設工程最快於今年下半年動工，料明年可完成工程；安吉項目下半年則會先開始建設住宅配套部份。中旅股價應聲彈高12%，如果有耐性都可以候低買啲擺吓。
近日市場興炒有穩定收益的股票，例外無受惠的，係一向盈利同派息穩定的電視廣播(511) ，原因就在業績內揭盅。上半年集團賺咗7億元，比去年減少9%。無綫6月播的世界盃，帶動上半年整體廣告收益按年增長5%，但因轉播世界盃令營運成本顯著增加，結果冚唔番條數，業績後股價跌穿50元，唔見咗2.6%。
早前有線(1097) 公佈業績，虧損減少咗，主要因為競投足球轉播權支出減少，但同時就出現收入下跌，反映無咗波就會走客，從無綫投波少賺咗，有線唔投波又少收咗，可見電視生意今日真係唔易做。報紙同電視收入受網絡衝擊，市場將焦點放係網媒，但自從《主場新聞》爆煲，大家發覺網媒賣廣告空間原來無想像咁大，媒體公司生意何去何從，兜個圈又要返番起步點再諗過。
陸羽仁
金融High Tea 舊文
