Marketing為王
2014年09月22日
阿里巴巴上周五在美國上市，定價68美元，第一手開賣已經跳升至92.7美元，之後全日企於90美元上方，收市報93.89美元，比招股價高38%。從香港股民角度看，無得炒阿里巴巴，覺得走寶。
阿里巴巴原本打算在香港上市，大家就可以玩吓炒作遊戲，搵番三茶兩飯。不過陸羽仁與好多資深股民傾過，大家對阿里巴巴嘅老闆馬雲印象麻麻，認為呢條友永無益人。阿里巴巴部份業務曾在香港上市，後來股價表現唔好就退市走人，股民對佢自然無乜好印象。
大吹客戶為先
無論如何，馬雲可以搞出全球二十大之一的上市公司，自有其成功秘方，其中的關鍵係Marketing(市場推廣)。阿里巴巴在紐交所上市的敲鐘儀式，馬雲沒有企出來。鏡頭所見，敲鐘台上有8人，有男有女，而且女性較多，當中還不乏美女。馬雲話他們都是淘寶天貓開店的客戶，讓他們親自敲鐘，正正代表了馬雲的經營哲學：客戶第一，僱員第二，股東第三咁話。
這就是Marketing啦！明明係公司上市，按道理應該以股東利益為主，馬雲就玩有型，話要客戶排第一。當然，他心知肚明，由於阿里巴巴的上市定價克制，買阿里巴巴股票，有賺無賠，股東非常滿意，自然沒有再講討好股東說話的需要。馬雲呢個時候話客戶第一，還身體力行，大玩唔出席上市現場這個遊戲，將敲鐘咁威水的儀式讓畀客戶，其Marketing的手段不可謂不高。
這還不止，他作為一個美國夢的中國版，人人羨慕。他接受美國的電視台訪問，主持人問他心目中的英雄是誰。他說是阿甘(Forrest Gump)。在電影《阿甘正傳》中，阿甘話「人生如一盒朱古力，你永遠也不會知道你將拿到甚麼。」(Life was like a box of chocolates. You never know what you"re gonna get.)馬雲話他每次沮喪，都再睇呢套戲，記住「無論乜嘢變，你仍然是你」。
扮阿甘食老虎
馬雲說話可以講成咁，你話係唔係「高」呢？馬雲沒有說他的偶像是股神巴菲特，或者是微軟老闆蓋茲，而係阿甘，我覺得他已多多少少吃透了美國文化，小人物當道。他以阿甘自居，好明顯玩緊「扮阿甘食老虎」嘅遊戲，諗住食美國股民一鑊啦。看完馬雲這些上市小動作，我覺得他是一個天生Marketing高手，所以才能由一名導遊，變成超級巨企的老闆。
以阿里巴巴首日收市價計算，市值達到2310億美元，已經超過facebook的2000億美元市值，亦成為全球二十大企業之一。如果兌換成港紙，阿里巴巴市值1.79萬億元，比騰訊(700) 的市值1.17萬億元，高53%。馬雲持有的支付寶現時還未上市，如果支付寶的估值有700億美元，阿里巴巴加支付寶的總市值就係騰訊的一倍。阿里巴巴及騰訊都是中國非常有概念而且強勁的公司，兩間公司的核心領域業務，在中國都是非常壟斷的，都一樣好有潛質。要準確地計算這類公司的合理市盈率(PE)及市值會比較困難，概括地估計，阿里巴巴及騰訊的規模及市值，應該相去不遠。阿里巴巴在美國上市後的市值，加上支付寶，居然比騰訊高咁多，比較合理的解釋，係美國科網股市場比香港熱很多。
科網股仲輸五六成
由於阿里巴巴上市，上周五港股也炒炒科網股，騰訊收報125.2元，升1.87%。其他科網股神州數字(8255) 收報1.61元，大升24.8%；IGG(8002) 收報4.67元，升7.36%。表面睇，好正呀。不過，大家真係要捽捽眼睇清楚啦，騰訊其實已經算係不錯了，只比8月高位134元低6.6%。大家不要見到神州數字上周五勁升25%，就以為呢隻股好得，其實這個價位仍比高位大跌61%！IGG也較高位插了超過57%，即使是比較大隻科技股好似金山軟件(3888) ，都插咗好多，較年內高位低38%！大家只要將鏡頭拉闊一點，本地的科網股，基本上是一齣齣慘劇。
我此前都講過，香港股市未到大好的時候。與美股本質不同，美股是大牛市，股價一路反覆向上，港股只屬上落市，即使有滬港通，也未到大牛市。在上落市中，資金在輪流炒不同板塊，去年炒科網股和濠賭股，今年，已經轉走晒去炒第二味，例如地產股。如果你一本通書睇到老，還在炒去年當旺嘅科網股，隨時輸到命都無。
唔好見阿里巴巴得，又走去炒科技股，香港科技股唔當炒。你問如果上星期買了科網股，點算？我建議你執到水的話，見好就收啦。通常大股上市，上完市後，當地市場的亢奮度都會減低。香港科網股市場基本上好冷，如果你睇完周末的報紙，以為科技股有得炒，跟人炒，科網股反彈一下，過一排又會跌番落嚟，變番地底泥。
水多炒吓新股
那麼，香港現在有乜好炒？我覺得其中一樣係炒新股。上星期，中國最大租車股神州租車(699) 首日掛牌，股價急升近三成，買中一手都執到2460元，係今年第二賺錢嘅新股，僅比年初上市的MAGNUM(2080) 少賺220元。神州租車是否真係咁勁？唔知道。但現時市道好，炒炒新股還可以。
另一隻新股中廣核美亞(1811) 即將上市，首日招股已錄得逾百倍超購，好多中小型證券行借爆孖展。無論係神州租車也好、中廣核美亞也好，都有些概念，前者有租車概念，後者係唯一的核電股概念，估計上市都可以炒作一番。不過，大家切記，不要與這些股票做人世，如果上市「嘭嘭」聲升咗上去，我覺得你都要小心，都要搵位落車。嚟緊嘅10月，有滬港通，所以新股仍可以炒吓，在市場熱的時候買咗新股，賺咗錢唔走，到市場變冷的時候，就夾住走唔甩啦。
陸羽仁
金融High Tea 舊文
