拆局
2014年10月07日
「佔中」行動係假期一度好緊張，尤其係學聯包圍政府總部當晚，大家都好驚警方會出動橡膠子彈鎮壓，好彩當晚不少中立人士出來疏導班學生哥情緒，包括兩大校長，結果有驚無險。過去兩日，社會情緒對係咪繼續佔領多區鬧市意見分歧，佔中陣營略為讓步，加上美國就業數據理想，上周五杜瓊斯指數勁升208點，港股先跌後升，收復250天牛熊分界線(23172點)收市。
清場有滬港通都唔掂
成個社會焦點落係佔中運動，投資市場都唔例外，昨日我上港台講起佔中因素，呢度不妨講多兩句拆吓局。呢次爆發的街頭抗爭，至今已經超過一個星期，?家大家估緊點收科，照牌面睇，不出兩個結局，一係示威群眾和平散去，危機暫時解決，未來再視乎政治局勢決定，咁個市就會反彈，發生呢個情況機會暫時當係五成啦；另一個就係清場，呢個情況出現都有不同手法，一個係有秩序和平清場，無人受傷，一個就係武力清場，做成好大震盪，個市難逃大插。
除政局以外，都有好多人關心若然要清場，咁中央會唔會叫停滬港通呢？呢樣我估同清場手法有好大關係，如果佔中傾唔掂數，要有秩序清場收科，因為唔知示威人士會唔會再嚟，阿爺好大機會做嘢，咁自由行，以至滬港通自然好大機會出招叫停；不過，萬一清場過程要硬手進行，搞出死傷兼國際嘩然，成個社會散晒，阿爺反而可能會繼續推滬港通，作為挺港措施。但係到時就算有滬港通，個市醫番都晒藥費矣。
按照呢個分析，重點唔係有無滬港通咁簡單，而係街頭抗爭究竟點樣收科。如果示威人士見好即收，中央對港政策大致不變，咁當然係上上大吉；換轉嚟講，若然係清場收尾，咁有無滬港通，個市都係手尾長，差別只係大衰抑或小衰而已！
個市炒反彈，恒生指數收報23315點，升番250點；國企指數收報10409點，升61點，成交由上周五的962億元，縮減至725.7億元，暫時個市仲要睇佔中發展，唔能夠太樂觀住。
藍籌股雖然普遍回勇，但論勢仲係軍工股呢排較好。憧憬四中全會政策出台對軍工股有利，相關股份受追捧。中航工業國際(232) 升7.60%，造0.85元；中航科工(2357) 彈4.19%，報5.97元；航天控股(031) 亦升6.42%，收報1.16元；中國航天萬源(1185) 漲3.09%，報1元。
香港電視(1137) 11月中將以OTT(Over-The-Top)方式，免費推出電視節目，股價勁升17.57%，報2.81元，傳統免費電視唔易做，好多人一早建議魔童不如搞網上電視啦，如果佢一早咁做就唔使燒咗幾億銀紙啦。
不過，?家佢迷途知返唔代表就踏上坦途，因為今時唔同往日，網上娛樂多咗咁多，要喺網上吸睛兼搶到廣告唔係咁易，估計股價興奮一輪，好大機會軟番落嚟，如果手頭上有呢隻股票，就算睇好佢都可以考慮放佢出嚟游吓水先。
另外，異動股力寶(226) 透露獲獨立第三方接洽售力寶華潤(156) 股權，今早齊復牌，股價獲炒上，力寶抽升10.19%，造4.65元；力寶華潤更狂升27.87%，造0.39元。力寶華潤係力寶同華潤兩個集團合作持有的股份，但大家近年各有各發展，喺咁嘅情況下，其實合作嘅需要已經唔係咁大，出售股權套現係合理安排，關鍵只係時間問題，通常呢類交易未必傾一次就成功，所以高追就無謂，如果股價回番，可以考慮買嚟放吓。
陸羽仁
金融High Tea 舊文
