魚樂無窮：專業旅運細粒易舞上
先提提早前兩隻推介，東江集團(2283)兩棍後再破頂，希望下月可見2.2元，當聖誕禮物。合豐(2320)第二大股東建滔(148)繼續減持，最新持股不足5%，掟貨近尾聲，好事近也！
唐牛上星期行經旅行社，間間都大排長龍，無他，聖誕新年臨近，加上日圓跌極都有，唔去旅行對唔住自己。主打日本團?東瀛遊亦趁勢上市，最快月底掛牌，集資兩億銀。影子股專業旅運(1235)大棍崛起，根據長假期前後例旺往績，升浪只在起步階段。
睇升幾多？睇舊年，年初試過單日爆升八成，年底由7毫子起步，炒到12月頭見1.47元，升幅1.1倍，兩次平均計都有95%升幅，噚日只升一成，零頭都未夠，加埋日圓喪跌、東瀛遊影子股概念，好戲在後頭。
市值6億貨源歸邊
睇本質，專業旅運一?都唔輸蝕，去年收益上升19%至3.1億銀，核心盈利升32%至4,330萬銀，現價市盈率13倍，同業香港中旅(308)同樣13倍。前者市值唔夠6億元，兩大股東持貨近八成，街貨市值億幾，後者153億元，邊隻易炒起，唔使我教啦！
公司細細粒，財務狀況卻靚爆鏡，手頭淨現金1.8億元，公司淨市值4億元，殼價都未夠。搵到錢派息亦慷慨，舊年全年派息4.5仙，現價息率四厘，好過唔少公用股。炒專業旅運，唔貪心，博重遊舊年底高位1.47元，講緊要升三成，同兩次大升浪比，依然好削！
唐牛
https://www.facebook.com/tongcow88
唐牛
魚樂無窮 - 唐牛 舊文
