冷靜版
2014/11/17 08:47:34
網誌分類: 經濟
滬港通今日通車，上週五紐約港股ADR價升151點，而當日夜期較是日期指亦升220點，預料港股會高開沖喜一下。
有人問我97年話港股直通車，恒指直炒上32000點，為何今次只升幾百點? 我估兩地股市的熱度都和當年不同，當時中港股市都較熱，特別是內地股市，一話有港股直通車，好多內地股民都想來香港大炒一場。但現時兩地股市都較冷，沒有那種想湧來香港的感覺。而且本來已經熱的股市再炒高容易，港股本來冷冷地，又被佔中打窒咗，所以有點氣氛不夠之感。
另外滬港通有限額限住，港股通限額(南下買港股)每日105億人民幣，滬股通(北上買滬股)每日限額130億元人民幣，以北上限額計，深滬兩市在旺場時易過2000億成交，滬股通只佔少數，初期影響較有限。就因為額度已限制了成件事的影響，今次滬港通試車，大有摸著石頭過河慢慢行之感，所以市場亦無咁易過熱。
總體來說，市場估計滬港通是北上多過南下，內地人愛炒大升股，港股唔係呢種味道。而內地A股市場未開放，如令繼QFII後再打開一個更大更靈活缺口，會鼓勵外國基金入場試玩A股。
總括而言，這個滬港通從時機到規模都係一個冷靜版，所以比較慢熱，長線利好，但短期不至於太顛。
另外講講美股。繼零售巨頭沃爾瑪派出理想嘅季度業績表，美國10月零售數額亦好過預期，包括巴克萊等大行上週五紛紛調高美國第四季度GDP增長預期，不過美股變動唔大，繼續呆呆哋。三大指數個別發展，杜指跌18點，收報17635點；標普500指數基本持平，收報2040點；納指有蘋果公司股價力撐，升8點至4689點。總結上周，亦係納指做得最好，漲1.2%，杜指及標普500指數靠穩，微升0.4%，市況都幾沉悶，但基調仍然唔錯，係連續第四個星期上漲。
美國10月零售額較上月增長0.3%，好過預期的增長0.2%，亦好過上月的下降0.3%。上個月係過去8個月以來零售額首次下跌，—來基數比較低，二來10月有萬聖節消費旺季推動，彈番上嚟，都好正常，美國正踏入傳統的消費旺季，預計零售額會一路升到明年1月，如果呢段時間零售唔掂，美國經濟就真係大劑啦。
經濟數據公佈之後，多家大行調高美國經濟增長預期，巴克萊將美國第四季度GDP增長預期從2.5%上修為2.6%；高盛則由2.4%向上修正至2.7%，第三季度GDP增長預期亦由3.2%上調至3.3%。但美股已經反映了經濟增長的預期，美股近期有放緩現象，呆呆下，相信係股市已經升得頗高，估值有點過高，正在搵位整固。
美國勞工部上週五公佈10月進/出口價格報告，10月進口價格較上月跌1.3%，下滑主要原因係國際油價大幅下挫，以及與美元上漲有關。油價大跌，除咗拉低整體進口價格外，對當地零售亦起到好大的積極作用。由於油價大跌，有分析預計，美國人在能源消費金額上慳番800億美元，係美國家庭十餘年來最高。據美國汽車協會，美國汽油價格已經連續46天下跌，11月1日汽油價格2010年3月以來首次跌破3美元/加侖。低油價尤其利好美國最低收入家庭，他們在汽油上的支出佔到稅前收入的13%。美國人口袋鬆動啲，感恩節及聖誕節的生意，又會好番啲。瑞信稱低能源費用已經幫助提振了消費者信心，10月數據上升5.5至94.5，係七年以來最高水準，油價跌對美國經濟有利呀。
陸羽仁
回應(0) 我想回應
陸羽仁 BLOG 舊文
