異動空間：中國電力有計
港股千億元成交繼續挾，年底前鑊氣算不俗，金融股升極都有，繼基建股後，升浪蔓延至電力股，煤炭、鋼鐵股，但相信係三兩日貨仔，有賺就食糊，以防市況年底前突然逆轉。A股孖展突破1萬億人仔，但全市齋炒幾十隻股份，逾千隻插逾5%，創業板更重挫半成，中伏易過中獎。兩極化市況炒大唔炒細，資金將更一窩蜂追爆升股，撈底就越撈越見鬼，追落後注定冇運行。升市淪為接火棒遊戲，可參與但注碼要細，落場只為不跑輸大市，絕非瞓身博中jackpot之時。
近排推介平保（2318）、太保（2601）、民行（1988）、招行（3968）、山水水泥（691）、中交建（1800）、中聯重科（1157）均已破位，有貨就減持部份食糊，其餘可以再坐。蓄勢突破股可留意中國電力（2380）。內地媒體報道，電力改革方案已上報國務院，如順利或短期內公佈。
大行分析指，電改有助確立電企新盈利模式，不再以買賣電力、賺取差價作為主要收入來源，而是按照政府輸配電價收取過網費，這令電企收入更穩定，中長期前景顯著改善，3.7元以下買入，目標先睇4.6元。
魏力
http://www.facebook.com/2012jason
魏力
異動空間 - 魏力 舊文
