低通脹困局
2014/12/02 09:17:02
網誌分類: 經濟
全球股市都唔得，但恆指勁跌620點咁誇，跌幅就全球跑第一！昨日投資氣氛唔靚仔，加上摩根大通和Markit聯合發布的全球製造業PMI(採購經理人指數)報告顯示，11月全球製造業PMI為51.8，創了14個月以來新低。美股無運行，不過比起歐亞市場，仍然硬淨，杜指跌52點，收報17776點，跌幅為0.3%；標普500指數跌15點，至2052點，跌幅0.7%；納指跌63點，收報4728點，跌幅1.3%。
跌得過籠的油金都反彈，油價在5連跌，昨日曾低見63.72美元，大反彈3.4%，今早輕微回軟，報68.52美元。黃金昨日低見1142美元，跟住隨油價大反彈，高見1218美元，收市升3.6%，最新報1205美元。
油股反彈，對杜指有支持，但反映科技股的納指明顯跑輸大市，主要受到蘋果股價大跌拖累。昨日最活躍個股係蘋果公司，朝早有巨量沽盤湧現，約9點51分，一分鐘內就有超過670萬股成交，股價在開市唔夠20分鐘，由全日最高跌落全日最低，勁跌7美元至112美元，市值蒸發了超過400億美元。但蘋果在低位隨即反彈，但全日仍跌3.3%至115.07美元。
蘋果忽然一跌的原因未明，分析估計係機構投資者以電腦買賣盤程式進行高頻交易(High Frequency Trading，簡稱HFT)引致。他們利用HFT從中賺取證券買賣價格的差價。有監控HFT活動的專家表示，昨日朝早同一時間，有大約300隻股出現類似的異常活動，可能係機構投資者設置了沽盤程式。HFT程式向來備受業界投批評，因為設定的程式在極短時間內發出大量賣盤指示，沽盤太多拖慢了整個報價活動，亦令股價在沒有人及時接貨的情況下急跌，造成大市大幅波動。
另一方面，大摩全球首席經濟學家Joachim Fels昨日在一個經濟論壇上，預測包括美國、中國及歐洲等多個主要國家明年通脹率，三個地區，預測中國通脹率最高，但亦只有2%，其次係美國有1.3%，而歐元區只有0.9%。佢指出明年全球經濟的主旋律將係「超低利率下的低通脹」，市場已經不再相信各國央行可以透過放水迅速將通脹率拉升到目標點。各國央行現在最重要的事情就是提高通脹率。
有見及此，他預計聯儲局加息時間不會如市場普遍預期的2015年中，而會推遲到2016年頭；歐元區更唔駛講啦，市場此前預期歐洲央行明年全面推出資産購買計劃(QE)的機會係40%，現時已經上升至50%。Fels估計歐央行很有可能在購買主權債券之前首先購買公司債券。至於中國，人行上個月的意外減息，呢個動作，明年仍會繼續。如果Fels的估計正確，出現呢個低通脹困局，美國又延遲加息的話，香港樓市會點呢? 政府有無反應呢?
講開中國經濟，唔可以唔提中國A股，德銀分析師統計全球資產今年表現，石油係表現最差的資産，其中WTI(德州輕甜原油)跌32%，布倫特石油跌36%；白銀亦於年內下跌了20% 。至於表現最威水就係內地A股，大漲31%！佢係呢兩個月大升扭轉敗局。排第二係標普500指數，升11%。而表現最差的市場則係俄羅斯、希臘同葡萄牙股市。
我明年繼續睇好內地，至於港股，昨日無情一跌，希望佢愈跌愈深，可以在低位買吓H股。
陸羽仁
回應(3) 我想回應
陸羽仁 BLOG 舊文
