金手指：重申一注買白銀
■白銀蘇醒，相信明年將可到一百二十美元的目標價。 資料圖片
兩周前瑞士央行喺周中來咗一次突襲，忽然脫鈎。之後個周一朋友王弼喺facebook來訊估孫柏文上周一定寫白銀見底嘅預測。點知上周欄位攞咗去批將會打擊做足功課投資者嘅停板制。
點都好，瑞央行脫鈎係一個轉捩點，唔係淨係得歐元或歐央行喺呢個雷曼爆破七年後先推量寬咁簡單。首先瑞央行今次唔喺周末宣佈脫鈎，雖然司長曾俊華都抽水，但最重要係都會逼包括曾司長在內嘅各國官員打自己啲金融機構。多唔使講，用value at risk計法，啲銀行以現生意量，單日最多可輸幾多？喺瑞士脫鈎後，連曾司長都會逼佢哋做少好多生意。仲有歐元區，除啱啱大選嘅希臘外，連葡萄牙十年國債息率都落到低過同期美債。若美國十年債息跌穿一厘，三或五年息率跌穿零厘邊負數，聯儲局學瑞士、丹麥將隔夜息亦係負數時，會點？
唔好講香港樓，因有啲陀地政治因素。以前我作為白銀戰隊隊長叫人買白銀對抗以印刷機做槍、鈔票作子彈嘅紙幣狂魔時，永遠第一句聽到嘅係：「冇息收呀！」而家你走出去買德國出嘅三年期債券，sorry，不但冇息收仲要畀錢佢。仲要本身歐元瘋狂貶值，搞到超怪現象出現，如人民幣同日可以兌美元跌停板亦同時兌歐元創十幾年新高。
記得買實貨
希臘若脫鈎兼走數，之後仲要回勇，試問邊個國家政客唔會跟？當周街壞賬，央行們又會借機印鈔票。今次白銀戰隊蘇醒了！二○一六年，將會係我嘅白銀一百二十美元目標價之限期。上轉白銀海嘯價八蚊上到五十美元用咗三十個月，舊年白銀十五美元一盎斯見底，一百二十美元照計就……
今次瑞士咁樣脫鈎，已係對全球現體制最清晰警號，佢哋被批會因脫鈎大內傷，我只可以話該國五百年太平非僥倖。雖然我講咗差不多九年，但今日都要重申，如果買白銀、黃金記得記得買實貨。
孫柏文
獨立股評人
http://facebook.com/shuen
本欄逢周二刊出
孫柏文
金手指 - 孫柏文 舊文
