異動空間：科網師兄弟歸位
歷史不斷重複，股票炒作模式亦然。金融、基建等舊經濟股回氣，熱錢新寵去番新經濟股。戰友聽到新經濟股四字，係咪恍如隔世呢？十年人事幾番新，一年股市幾個浪，望嚇五十大升幅榜，啲冧巴直情係一年前嘅翻版！遊、軟件、支付、手機、濠賭、彩票、風電、物流股，一年前全部癲到無倫，之後散水失曬蹤。如今師兄弟返曬嚟，有冇大龍鳳就唔知，但賭一個小反彈應該有水位。
魏力上周三畀咗隻金山軟件（3888），短期試衝廿蚊，衝得破就坐上去，衝唔過就食咗先。軟件兄弟幫之中，擎天（1297）市值細、業績增長強，走勢一直都好靚，穩中求勝可以揀呢隻。此外，彩票股亦可以一試。大陸剛爆出「雙色球」造假疑雲，彩票股咁都唔插，反映有大戶收集。華彩（1371）近月接連獲得多省彩票終端機採購定單，盈利增長高於同業，技術指標亦見好轉，短線可博一毫子，睇一百天線0.7元。
推介幾隻殼股都開車了，另一疑似目標係MegaExpo（1360），四億元市值，十一月做完配股似為收乾貨源等賣。
魏力
http://www.facebook.com/2012jason
魏力
異動空間 - 魏力 舊文
