魚樂無窮：金利來八厘息的誘惑
■金利來舊年全年派息二十七仙。圖為集團主席曾憲梓。 資料圖片
投資市場風高浪急程度乃近年罕見，高息股擁有財息兼收特質，難怪特別受歡迎。唐牛今日推介嘅金利來（533），絕對係當中既表表者。叫得高息股，派息當然慷慨，金利來舊年全年派息二十七仙，現價計息率八厘。嘩！聽見都流口水，唔單止咁，公司自二○○○年起無間斷派息，track record一流，揸得安心。
講番本業，金利來有兩瓣業務。一、產銷金利來品牌服裝、皮具及配飾；二、物業投資及發展。唔講唔知，大家以為金利來係上一輩先用，但原來喺大陸係高檔品牌，所以近期習李瘋狂打貪，對金利來都有影響，分部業績下跌兩成。不過磚頭有價，令其物業投資及發展收益增長近倍，完全彌補服飾業績倒退。
高息股通常增長潛力不大，但金利來就唔同，事關總部物業金利來集團中心，有機會飛上枝頭變鳳凰。點解咁講，原來早喺二○一○年，政府建議將十四幅工業用地改規劃為住宅，金利來集團中心正正係候選佳麗之一，該物業總樓面面積二十五萬呎，用兩萬蚊一呎計，總值五十億銀，公司最新市值只得三十三億銀，一旦計劃落實，金利來肯定升價十倍。
唔好忘記，金利來乃現金牛一隻，現價3.38元，當中1.23元係現金，扣減後市盈率只得8.5倍，市賬率亦未夠一倍，無論從邊個角度出發，都值得真金白銀支持。
唐牛
https://www.facebook.com/tongcow88
唐牛
魚樂無窮 - 唐牛 舊文
