中環在線：加入港交所三年
周松崗份糧多咗一倍
■周松崗、夏理遜同利子厚係港交所一班獨董入面人工最高嗰三個。
個個打工仔都想搵份薪高糧準嘅筍工，港交所（388）主席周松崗就搵到喇。佢加入咗港交所短短三年，份糧已經多咗超過一倍半，難怪佢成日出嚟都係四萬咁口喇。
根據港交所資料，周松崗舊年董事袍金有二百三十六萬，雖然同佢以前喺港鐵（066）做行政總裁嘅時候，搵過千萬元比較，𠵱家份人工只係濕濕碎，但係佢以前老闆、港鐵主席錢果豐都係得一百二十萬袍金，周松崗明顯搵到個更靚嘅主席位。
舊年開會僅缺席一次
而且，睇番佢三年前啱啱獲委任做港交所董事嗰陣，佢嘅人工至今已經多咗一倍半。周松崗當年加入港交所，最初只做董事，加上四月返工，計唔足一年，董事袍金只得九十六萬，轉眼加到兩百幾萬都幾突出。
不過佢都唔係不勞而獲。周松崗除咗擔任董事會主席，港交所旗下有八個委員會，周松崗就坐咗其中五個，包括風險管理、提名，咁當然仲有關乎大家人工嘅薪酬委員會。舊年佢需要出席合共三十五個董事會、股東會同埋委員會會議，見佢出席率十分高，只係缺席過一次咁大把，加上佢做埋港交所旗下倫敦金屬交易所（LME）董事，抵佢袋多啲。
除咗周松崗之外，港交所一班非執董嘅人工都算唔錯，全部十三名非執董，舊年人工平均加幅超過兩成，當中利子厚、李君豪、郭志標同夏理遜都入到「百萬圓桌」，董事袍金過百萬，夏理遜亦身兼LME董事兼坐多個委員會，袍金仲高過周松崗㖭。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
