金手指：太陽能死穴概念
■最容易𠱁人投資天然氣發電就係現今的發電廠賺大錢。 資料圖片
兩會會議有乜政策，傾側邊個板塊，利益輸送畀邊間公司，非常多風聲。不過，返過寫字樓工都知個會講到天花龍鳳，都係要出minutes時先確定真假。咁根據國情，一早內定都要做戲，等到個會開完，即下周先會有報告。而往往兩會報告都同預期有出入，話做某啲嘢，力度都可能比預期多或少。
天然氣發電受捧
上周二孫柏文就強烈推介「大陸有錢地區用天然氣發電」概念，點知啲人走曬去炒太陽能，而我建議大家買主要業務喺北京用天然氣發電嘅京能（579），就跌咗。首先，唔知係咪因「獨立」紀錄片《穹頂之下》下架，有人話：「即係打空氣汙染係流料啦！」黐線。呢齣紀錄片邊有可能係獨立拍攝？邊有可能會獨立拍，批政府嘅片會有部長級人士讚？佢一定係有中央最高領導支持先得，目標係要為兩會定調。而聽聞非常成功，因《穹頂之下》及政策反應真係成為兩會大話題。
但你會問：「真係下咗架喎！」喺大陸做show都要受控制先得。當你齣片喺幾日點擊率過億，共產黨始終都驚失控，所以見好即收。唔好話齣鬧政府嘅片，你試嚇搞個體育會有過億成員、fans，你都會俾人搞。咁若你話炒太陽能同風力最能食中打空氣汙染概念，呢個我就絕對唔同意。上期我話過天然氣係成個打空氣汙染概念核心，原因係太陽能同風力個死穴，就係可忽然冇，當用電量大時你又唔可以停供應，故要有後備。問啲不設實際嘅人，佢哋會話「後備」概念就買電池股，但真正嘅後備供應就係嗰啲一嚇可撻著嘅熱能發電機組，即天然氣爐（煤炭唔得）。
當國家越要減煤炭發電，越依賴太陽能同風力，就要越支持天然氣發電。最容易𠱁人投資天然氣發電就係令現今啲天然氣發電廠賺大錢。一賺股價升，根據國情就會令啲人一窩蜂去做。咁佢哋連大賺、股價升嗰段都未發生就話冚旗？言之過早啦。等兩會報告出，到時睇嚇京能點。
孫柏文
獨立股評人
http://facebook.com/shuen
本欄逢周二刊出
孫柏文
金手指 - 孫柏文 舊文
