一周三件：上海集優等爆
■王強任董事長的上海集優，兩瓣新增業務均有表現，前景看好。 資料圖片
上海集優（2345）上年積極去舊迎新，業務引入靚仔嘅瓣數，加埋食住阿爺幾瓣嘅國策，今年應該turnaround，絕對有得諗。
上海集優主打包括核電機組在內嘅葉片，同埋鐵路運輸、航天等軸承產品，阿媽上海電氣集團，係大孖沙級數。二○一二年（十二月結）同二○一三年度，上海集優盈利由上億元人仔單位，跌到得千萬元盈利單位。而上年上半年集團盈利繼續跌兩成，老老實實，係唔多盞，而集團就快派二○一四年嘅成績單，亦未必太靚仔。但喺嚟緊嘅日子，有唔同嘅睇法。
兩瓣新增業務看俏
上海集優主打瓣數，開正阿爺正係全力加速嘅鐵路、核電同風電項目，已經係翻身條件。又上年，上海集優將非核心瓣數出售，又先後購入緊固件生產商Nedschroef，同埋上海船研環保。
呢兩間公司有幾巴閉？前邊嘅Nedschroef，係全球性龍頭之一，客戶包括寶馬、大眾、奧迪等名牌。據著名汽車調查公司Fourin預測，環球經濟回暖，喺今年，全球汽車銷量，會歷史性突破九千萬輛大關，增幅近4%。
至於後邊嘅船研環保，喺祖國得七家當中，其中一間通過祖國船級社認證企業。隨住國際海事組織，通過新公約，到時，全球所有船舶，都要安裝壓載水處理設備，上海集優就以「井噴」來形容呢瓣需求。
睇到亦諗到嘅係，兩瓣新增業務，食到應一應，肥仔盈利可以喺今年開始反映。再講，上海集優現價（1.39元）比起二○○七年高位4.5元跌咗七成，PB得0.47倍，場內主打風電同核電設備嘅上海電氣（2727），PB上到1.4倍。呢轉煲上海集優，當翻半番到兩蚊計，PB先得0.7倍，今年預測15倍PE，邊有耐追到上氣。
錢雋
細價股專家
本欄逢周二、三、五刊出
錢雋
一周三件 - 錢雋 舊文
